उदयपुर : नेपाली कांग्रेस उदयपुरको जिल्लासभापतिमा संस्थापन (देउवा) पक्षका उमेदवार हिमाल कार्की विजयी भएका छन् । १४ औँ महाधिवेशनलाई लक्षित गरी भएको निर्वाचनमा कार्कीले प्रतिष्पर्धी विदुर बस्नेतलाई १७८ मतान्तरले विजयी भएका हुन् ।
मतपरिणाम अनुसार कार्कीले ७६७ मत र निकटतम प्रतिद्वन्द्वी विदुर बस्नेतले ५८९ मत प्राप्त गरे । बस्नेत निर्वतमान पार्टी सभापति हुन् भने कार्की १ नम्बर प्रदेश सरकारका भौतिक पूर्वाधार विकासमन्त्री एवम पूर्वजिल्ला सभापति हुन् ।
त्यसैगरी उपसभापतिमा कार्की समूहका भिमचन्द्र राईले ७४७ र बलबहादुर तामाङले ६५८ मत ल्याएर विजयी भए । त्यसैगरी सचिवमा मुरारी खडका र राजेशचन्द्र श्रेष्ठ निर्वाचित भएका छन् । सहसचिवमा कार्की समूहका टिकाराम बुढाथोकी र चन्द्रदिप पौडेल विजयी भए । रोचक कुरा त कार्की र बस्नेतबीच १२ औं महाधिवेशनदेखि पार्टी सभापतिमा प्रतिस्पर्धा हुँदै आएको छ ।
१२ औँ महाधिवेशनमा कार्कीले बस्नेतलाई पछि पार्दै विजयी भएका थिए । त्यसपछि भएको १३ औं महाधिवेशनमा कार्कीलाई पराजित गर्दै बस्नेत जिल्ला सभापति भएका थिए। पार्टी विभाजनका क्रममा कार्की देउवा पक्षका जिल्ला सचिव् हुन् ।
दुबै पक्ष प्यानलगतरुपमा चुनावी मैदानमा उत्रिएका छन् । वडाबाटै विभाजित भएर जिल्ला तहसम्म आइपुग्दा जिल्लामा कार्की समूहको वर्चश्व रहेको छ । एक जिल्ला सदस्य नरेन्द्र थापा मात्रै बस्नेत समूहबाट विजयी भएका छन् ।
दुई निर्वाचन क्षेत्र रहेको उदयपुरमा क्षेत्रीय सभापति पनि कार्की प्यानलकै खग्रेन्द्र राई(काजी) र रामकुमार राई निर्वाचित भएका छन् । दुबै क्षेत्रमा महाधिवेशन प्रतिनिधिबाहेक देउवा पक्षको प्यानल नै विजयी भएको छ ।
८ गाउँपालिका र ८ नगरपालिका गरी १६ स्थानीय तह रहेको उदयपुरमा बेलका, चौदण्डिगढी, त्रियुगा नगरपालिका र लिम्चुङ्गबुङ्ग गाउँपालिकामा देउवा पक्ष र कटारी नगरपालिका र रौतामाई गाउँपालिकामा रामचन्द्र पौडेल निकट सभापतिहरु विजयी भएका छन् ।
ताप्लि र उदयपुरगढी गाउँपालिकामा सर्वसहमत नेतृत्व चयन भएकाले दुबै सभापति हालसम्म कुनै पक्षमा खुलेका छैनन् । त्यसैगरी ४ वटा प्रदेश सभा निर्वाचन क्षेत्र रहेको जिल्लामा ३ वटा देउवा पक्ष र १ वटा पौडेल पक्षबाट निर्वाचित भएका छन् ।
प्रतिक्रिया दिनुहोस !
