उदयपुर : खेतीयोग्य जमिन भएर पनि सिँचाइको अभावमा बाँझो खेत राख्न बाध्य उदयपुरको लिम्चुङबुङ गाउँपालिका-५ ढुकुरथुमबासीको सपना ४६ वर्षपछि पूरा भएको छ ।
सिँचाइका लागि २०३२ सालदेखि निरन्तर आवाज उठाउँदै आएका स्थानीयले यस वर्ष करिब डेढ करोडको लागतमा ढुकरथुम-जाँते सिँचाई आयोजना निर्माण भएसँगै खेतमा बाली लगाउन अब आकाशको भर टरेको छ ।
सिँचाइ योजनाका अध्यक्ष सुरेन्द्र राई भन्छन्, ‘२०३२ सालमा पहिलो पटक योजना पेश गरेकोमा, प्रकृया पुरा गर्दा गर्दै २०७१ सालबाट काम शुरु भयो । उनले थपे, ‘२०५२ सालमा तत्कालिन सिँचाइ डिभिजन कार्यालय उदयपुरका प्रमुख हरिप्रसाद चौलागाईले योजनाको कामलाई अघि बढाउँदा केहि आश पलाएको थियो तर पछिल्लो समयको राजनीतिक घटनाक्रमले समयमा शुरु हुन सकेन ।
योजना निर्माणका लागि २०७१ सालमा सिँचाइ डिभिजन कार्यालय उदयपुरबाट पहिलो किस्तामा १ लाख ९० हजार बजेट बिनियोजन भएसँगै २०७१ साल चैत १५ गतेदेखि योजनाको काम शुरु भएको अध्यक्ष राईले बताए । उनी भन्छन्, ‘कामको थालनी भएपछि सिँचाइ डिभिजन कार्यालय उदयपुरले क्रमागतरुपमा रकम विनियोजन गर्दै १ करोड ३४ लाख रुपैया विनियोजन गरेको र जनश्रमदान बाफत १४ लाख ७४ हजार गरी १ करोड ४८ लाख ७४ हजारको लागतमा काम शुरु गरेका हौं ।
पहाडी भूभाग भएकाले खोलाको पानी कुलो (पैनी) बनाएर ल्याउन चट्टान फुटाउनु पर्ने, समयपनि निकै लाग्ने भएकाले ठूलो प्लाष्टिक पाईप बिछ्याएर सबैको खेतमा पुर्याइएको स्थानीय दिनेश राई बताउँछन् । योजना सफल भएसँगै स्थानीयमा खुशी छाएको छ ।
वडाध्यक्ष भूपाल खड्का भन्छन्, ‘यस योजनाले ढुकुरथुमका ५ दर्जन बढि घरधुरीका परिवारलाई राहत मिलेको छ, यसलाई निरन्तरता दिन योजना दीर्घकालीन हुन आवश्यक रहेको छ ।’ ‘खेतीयोग्य जमिन भएकाले सिजनमा धान र अन्य समयमा तरकारी खेती लगाएर गरिबी हटाउँछौ । उनले भने, ‘अध्यक्ष कृषि परियोजना कार्यक्रम पालिकाले चलाउँदै आएको छ, त्यसबाट यस क्षेत्रका किसानलाई प्रोत्साहन गर्छौ ।
अधिकांश युवाहरु रहेकाले युवालाई वैदेशिक रोजगार रोक्नका लागि पनि परियोजना सफल हुने बताए । सिँचाइ डिभिजनका प्रमुख देबनन्द मण्डलले योजना जनमुखी रहेको र आगामी दिनमा योजनाले ढुकुरथुमबासी जनताहरुको जीवनस्तर परिवर्तन हुने बताए ।
गाउँपालिकाका उप–प्रमुख रमिला राईले यसको दिगोपनका लागि पालिकाले सहयोग गर्ने बताईन् । उनी थप्छिन्–‘योजना सम्पन्न सहजै हुन्छ तर त्यसको दिगोपना निकै कठिन हुन्छ, तसर्थ मर्मतसम्भारका लागि उचित बजेट व्यवस्थापन गर्नेछौ ।’
प्रतिक्रिया दिनुहोस !
