सिन्धुली : नेकपा एमाले सिन्धुलीको अध्यक्षमा कुमारबहादुर कार्की (रामकुमार) निर्वाचित भएका छन् । ४८८ मत ल्याएर कार्की अध्यक्षमा विजयी भएका हुन् । कार्कीका प्रत्यासी उम्मेद्वार प्रदिप कटुवालले ४०८ मत प्राप्त गरे । कटुवाल निवर्तमान जिल्ला अध्यक्ष तथा बागमती प्रदेशसभा सदस्य तथा पूर्वमन्त्री हुन् । विजयी कार्की कटुवालका आफ्नै जेठान हुन् । उनी यसअघि राष्ट्रिय भूमि आयोग जिल्ला अध्यक्ष समेत थिए ।
यस्तै जिल्ला कमिटी उपाध्यक्षमा कर्णबहादुर घिसिङ ४४९ मत ल्याएर विजयी भएका छन् । उनका निकटतम प्रतिद्वन्दी विनोद खड्काले ४०४ मत प्राप्त गरे । उपाध्यक्षका अर्का उमेद्वार जगदिश्वर तोलाङ्गेले २१ मत प्राप्त गरेका छन् । उपाध्यक्षमा पारजित खड्का पनि बागमती प्रदेश सभाका सदस्य हुन् ।
सचिवमा नारायण बराल निर्विरोध चयन भएका थिए । उपचिवमा रश्मिला देवकोटा र मञ्जु देवकोटा विजयी भएका छन् । मन्जु कमलामाई नगरपालिकाकी उपमेयर हुन् ।
आइतबार भएको मतदानको मतगणना सोमबार बिहान सम्पन्न भएको हो । खुल्ला तथा समावेशी सदस्यहरुको मतगणा बाँकी छ । बाँकी सदस्यहरुको मतगणा सोमबार दिउँसो १ बजेबाट सुरु हुने नेकपा एमाले जिल्ला कमिटी निर्वाचन समितिका मुख्य निर्वाचन अधिकृत पुरुषोत्तम दाहालले जानकारी दिए ।
निर्वाचनमा ९ सय ३ मत खसेको थियो । एमाले जिल्ला कमिटी सदस्य पदका लागि युवाहरुबीच प्रतिस्पर्धा भएको छ ।
प्रतिक्रिया दिनुहोस !
