ढल्केवर : धनुषामा हत्या गरिएको अवस्थामा भेटिएको युवतीको सनाखत भएको छ। बुधबार साँझ रगतले लतपतिएको अवस्थामा फेला परेको शव धनुषाको मिथिला नगरपालिका–१ ढल्केवरकी इन्द्रकला कुमारी महतोको रहेको प्रहरीले जनाएको छ।
बुधबार धनुषाधाम नगरपालिका–६ मालटोलस्थित पूर्वपश्चिम राजमार्गदेखि करिब २ किलोमिटर दक्षिणतर्फ आँपको बगैचामा ती युवतीको शव फेला परेको थियो। शवको प्रकृति हेर्दा युवतीको करणी गरी हत्या गरेको हुन सक्ने प्रहरीको आशंका छ। ‘शवको पोस्टमार्टमपछि थप कुराहरु खुल्छ,’अनुसन्धानमा खटिएका एक प्रहरी अधिकारीले भने।
बिहीबार इलाका प्रहरी कार्यालय ढल्केवरले एकजनालाई नियन्त्रणमा लिएर घटनाको अनुसन्धान थालेको छ। तर पक्राउ परेकाको नाम भने प्रहरीले खुलाउन चाहेका छैनन्।
युवतीको हत्यामा संलग्न हुनसक्ने आशंकामा एकजनालाई नियन्त्रणमा लिएर घटनाको सुक्ष्म अनुसन्धान गरिरहेको इलाका प्रहरी कार्यालय ढल्केवरका प्रहरी निरीक्षक प्रदीप सुवेदीले जानकारी दिए।
प्रतिक्रिया दिनुहोस !
