ढल्केवर(धनुषा) : धनुषामा दुई मोटरसाइकल एकआपसमा ठोक्किदा एक जनाको मृत्यु भएको छ भने एकजना घाइते भएका छन्। शनिबार साँझ दुई मोटरसाइकल एकआपसमा ठोक्किएर दुर्घटना हुँदा धनुषाधाम नगरपालिका–६ मालटोलका ४२ वर्षीय रामबहादुर गोले मगरको मृत्यु भएको ईलाका प्रहरी कार्यालय ढल्केवरले जनाएको छ।
पूर्वपश्चिम लोकमार्ग अन्तर्गत धनुषाको धनुषाधाम नगरपालिका–६ मालटोलस्थित पश्चिमबाट पूर्वतर्फ जाँदै गरेको बा.७४ प ७५३९ नम्बरको मोटरसाइकल र विपरित दिशाबाट आउँदै गरेको ज.१२ प १६७२ नम्बरको मोटरसाइकल एकआपसमा ठोक्किदा दुर्घटना भएको ईलाका प्रहरी कार्यालय ढल्केवरका प्रहरी निरीक्षक प्रदिप सुवेदीले जानकारी दिए।
उनका अनुसार दुर्घटनामा परेर गम्भीर घाइते भएका ज.१२ प १६७२ नम्बरको मोटरसाइकल चालक मगरको धनुषाको लालगढस्थित मोडेल हस्पिटलमा उपचारको क्रममा मृत्यु भएको हो। दुर्घटनामा अर्का गम्भीर घाइते बा.७४ प ७५३९ नम्बरको मोटरसाइकल चालक सिरहाको कर्जन्हा नगरपालिका–५ बस्ने २४ वर्षीय अभिषेक घिमिरेको मोडेल हस्पिटलमै उपचार भइरहेको प्रहरी निरीक्षक सुवेदीले जनाए।
दुर्घटनाग्रस्त दुवै मोटरसाइकल प्रहरी नियन्त्रणमा रहेको ईलाका प्रहरी कार्यालय ढल्केवरले जनाएको छ।
प्रतिक्रिया दिनुहोस !
