काठमाडौं : गैरआवासीय नेपाली संघ (एनआरएनए) चुनावी रौनक बढ्दै गएको छ । चुनावका लागि दुई पक्ष मैदानमा उत्रिसकेका छन् ।
चुनावका लागि एनआरएनका उपाध्यक्षद्धय डा. बद्री केसी समूह र रबिना थापा समूहले उम्मेदवारी दर्ता गरिसकेका छन् । सुरुदेखि फरक मत राख्दै आएका कुल आचार्य टिम भने चुनावमा भाग लिन हिच्किचाइरहेका छन् । यद्यपी, शुक्रबारसम्म उम्मेदवारी दर्ताको समय छ ।
अब कुल आचार्य टिम नआए पनि चुनाव नरोकिने एनआरएनए अभियान्ताहरु बताउँदै आएका छन् । वार्ताका नाममा एनआरएनएलाई अनिर्णयको बन्दी गराएको भन्दै अब निर्वाचन कुनै पनि हालतमा रोक्न नहुने संस्थापन पक्षमा दवाव छ । लामो समयदेखिको विवाद मिलाउन एनआरएनएको उच्चस्तरको वार्ता भइरहेको छ । तर, वार्ता वार्ता अझै निष्कर्षमा पुग्न सकेको छैन ।
आचार्य टिमले भने आफ्ना माग सुनुवाई नगरेको भन्दै बिहीबारसम्म उम्मेदवारी घोषणामा भाग लिएको छैन । प्रतिनिधि विवादका कारण करिब पाँच महिनादेखि निर्वाचन प्रभावित भएको छ । पटकपटक मिति तय भएर निर्वाचन सरिरहेको थियो ।
निर्वाचनका लागि ३ हजार ६ सय मतदाता छन् । विवाद समाधान गर्न संघले शेष घलेको नेतृत्वमा एक उच्चस्तरीय समिति गठन गरेको थियो । उक्त समितिले १ हजार मतदाता हटाउन सिफारिस गरेको थियो ।
कसको पर्यो उम्मेदवारी ?
निर्वाचनका लागि चार दर्जनभन्दा बढी उम्मेदवारले मनोनयन दर्ता गराएको निर्वाचन समितिले जनाएको छ । बिहिबार बेलुकासम्म विभिन्न ५१ पदको लागि पदमा चार दर्जनभन्दा बढी उम्मेदवारले मनोनयन दर्ता गराएका हुन् ।
उपाध्यक्षको लागि अष्ट्रेलियाबाट धर्मराज अधिकारी, बेलायतबाट डा हेमराज शर्मा, जय प्रकाश गुरुगं, ओमनबाट डिबी क्षेत्री, लगायतको उम्मेदवारी परेको छ । महिला उपाध्यक्षमा साउदी अरबबाट यासमिन बेगम सैयदले उम्मेदवारी दिएकी छिन् । यस्तै अफ्रिकाबाट रोशन थापाले युवा उपाध्यक्षमा उम्मेदवारी दर्ता गराएका छन् ।
महासचिवमा अमेरिकाबाट गौरीराज जोशी र बेलायतबाट विनय अधिकारीले उम्मेदवारी दिएका छन् । सचिवमा अमेरिकाबाट शंकर खड्का, बेलायतबाट रामशरण सिम्खडा, जापानबाट ओम गुरुङ, क्यानाडाबाट चिरनजीवी घिमिरेले उम्मेदवारी दिएका छन् । महिला सचिवमा हङकङबाट राधिका गुरुङले उम्मेदवारी दर्ता गराएकी छिन् ।
महिला सहकोषाध्यक्षमा अमेरिकाबाट युमना भट्टराई, युवा संयोजकमा डेनमार्कबाट रवीन्द्र खड्काले उम्मेदवारी दिएका छन् । महिला संयोजककमा बेलायतबाट संगिता मरहठ्ठाले उम्मेदवारी परेको छ ।
युरोप क्षेत्रीय संयोजकमा जर्मनीबाट सन्तोष भट्टराईले उम्मेदवारी दर्ता गरेका छन् । ओसिनिया क्षेत्रीय संयोजकमा अष्ट्रेलियाबाट दिनेशराज जोशी र न्यूजील्याण्डबाट लाल केसीले उम्मेदवारी दर्ता गरेका छन् । मध्यपूर्व क्षेत्रीय संयोजकमा साउदीबाट राजेन्द्र अर्याल (जोन) को उम्मेदवारी परेको छ । यस्तै एसिया प्यासिफिक क्षेत्रीय संयोजकमा जापानबाट पारसमणि पोखरेलले उम्मेदवारी दिएका छन् ।
एसिया प्यासिफिक महिला संयोजकमा मकाउबाट शान्तिदेवी अधिकारीले उम्मेदवारी दिएकी छिन् । युरोप क्षेत्रीय उपसंयोजक पदका लागि जर्मनीबाट नवराज रोसायर र बेलायतबाट ललित न्यौपाने र सागर सुवेदीले उम्मेदवारी दर्ता गराएका छन् । यता एसिया प्यासिफिक क्षेत्रीय उपसंयोजकमा जापानबाट दलिवल खड्का र चीनबाट नवीन विकले उम्मेदवारी दिएका छन् ।
प्रतिक्रिया दिनुहोस !
