कांग्रेसको चुनाबी अभियान जोरायल गाउँपालिकाबाट सुरु
फागुन २९, २०७८ आइतबार १७:५७:०
डोटी : नेपाली कांग्रेसको केन्द्रीय अभियान अन्तर्गत डोटीमा पनि आइतबारदेखि एक महिने चुनाबी अभियान सुरु भएको छ। नेपाली काँग्रेसको नेतृत्वमा हासिल भएका राजनैतिक तथा आर्थिक उपलब्धिबारे जनतालाई जानकारी गराई पार्टीका उमेद्वारहरुको पक्षमा मतदानका लागि आग्रह गर्ने उद्देश्यले अभियान संचालन गर्न लागिएको डोटी कांग्रेसले जनाएको छ।
‘घरघर जाऔं, कांग्रेस जिताऔं’ भन्ने मूल नाराका साथ संचालन भएको एक महिने अभियानका लागि डोटीमा कांग्रेसका केन्द्रीय सदस्य एवं प्रतिनिधिकारुपमा किरण गिरी सहभागि भएका छन्। जिल्लाको जोरायल गाउँपालिकाबाट अभियान सुरु भएको छ।
अभियान अन्तर्गत डोटीमा पहिलो चरणमा पालिका स्तरमा कार्यक्रम गरिने डोटी कांग्रेसले जनाएको छ। केन्द्रीय प्रतिनिधि गिरी, नेपाली कांग्रेस सुदूरपश्चिम प्रदेश समिति सभापति बीर बहादुर बलायर, प्रदेशसभा सदस्य भरत खड्का लगायत नेताहरुको सहभागितामा कार्यक्रम भईरहेको नेपाली कांग्रेस डोटीका सभापति नरेन्द्र बहादुर सिंहले जानकारी दिए। उता अन्य जिल्लास्तरका नेता तथा कार्यकर्ताहरु भने आ-आफ्नो गाउँ अभियानमा लागि राख्ने सभापति सिंहले जानकारी दिए।
त्यसैगरी फागुन ३० गते बडीकेदार गाउँपालिकामा, चैत १ गते बोगटान गाउँपालिकामा, चैत २ गते केआईसिंह गाउँपालिकामा, चैत ४ गते सायल गाउँपालिकामा, चैत ५ गते आदर्श गाउँपालिकामा, चैत ६ गते दिपायल सिलगढी नगरपालिकामा, चैत ७ गते पूर्बीचौकी गाउँपालिकामा तथा चैत ८ गते शिखर नगरपालिकामा कार्यक्रम गरिने बताइएको छ। पालिका स्तरका कार्यक्रम पश्चात केन्द्रिय प्रतिनिधी एक महिनासम्म जिल्लामै रहने र गाउँ अभियानमा सहभागि हुने जनाइएको छ।
स्थानीय चुनाबमा कांग्रेस उम्मेदवारलाई विजय गराउने र एमसीसीका विषयमा भ्रम चिर्ने लगायतका उद्देश्य लिएर गाउँ अभियानमा सुरु भएको सभापति सिंहले बताए। कांग्रेसले चुनावसम्म सबै नागरिकलाई कोरोनाविरुद्धको खोप लगाउने, बिगतको ओली सरकारले तीन वर्षमा गरेका जनविरोधी र असंवैधानिक कदमलाई जनता समक्ष व्यापकरुपमा लैजाने उद्देश्यले कार्यक्रम गरिएको उनले जनाए।
प्रतिक्रिया दिनुहोस !
