एमालेसँग चुनावी तालमेल घोषणा गरेको ४ घन्टा नवित्दै लोसपामा विवाद

वीरगन्ज : वीरगन्ज महानगरमा नेकपा एमालेसँग चुनावी तालमेल गर्ने विषयमा लोकतान्त्रिक समाजवादी पार्टी (लोसपा) मा विवाद भएको छ ।  बिहीबार बिहान एमाले नेताहरुसँगै पत्रकार सम्मेलन गरेर लोसपाका वरिष्ठ नेता लक्ष्मणलाल कर्ण र जिल्ला अध्यक्ष पुरुषोत्तमलाल झाले वीरगन्ज महानगरमा एमालेसँग चुनावी तालमेल गरिएको घोषणा गरेका थिए । 

तर उक्त घोषणाको ४ घण्टा नवित्दै लोसपा पर्साका ३ जना जिल्ला उपाध्यक्षले संयुक्त विज्ञप्ति जारी गर्दै महानगरमा एमालेसँग चुनावी तालमेल नगरिएको बताएका छन् ।  बिहीबार दिउँसो लोसपाका जिल्ला उपाध्यक्षत्रय कृष्णा पटेल , राजेश कुमार साह र देवानन्द यादवले संयुक्त विज्ञप्ति जारी गर्दै महानगरमा लोसपा एक्लै चुनाव लड्न तयार रहेको पनि बताएका छन् । 

विज्ञप्तीमा लोसपाको जिल्ला कार्यसमितिले महानगरमा अन्य कुनै पनि दलसँग चुनावी तालमेल गर्नेबारे निर्णय नै नगरेकाले , एमाले र लोसपाबीच तालमेल गरिएको भन्नुको कुनै औचित्य नभएको उल्लेख छ । लोसपा पार्टीलाई समाप्त पार्ने नियतले कुनै नेता विशेषको इशारामा एमालेसँग तालमेल गरिएकाले यसप्रति तीनैजना उपाध्यक्षले आपत्ति पनि जनाएका छन् ।

लोसपा वीरगन्ज महानगरका अध्यक्ष ओम प्रकाश सर्राफले पनि एमालेसंग गरिएको तालमेल प्रति आपत्ति जनाएका छन् ।  सर्राफले महानगरमा एमालेसंग चुनावी तालमेल गर्ने  बारेमा पार्टी भित्र कुनै पनि किसिमको छलफल नै नभएको  बताए । 
अन्नपूर्णसँग कुरा गर्दै सर्राफले भने,'पार्टीको महानगर अध्यक्ष म हुँ , तर एमालेसँग सहमति गर्नेबारे मलाई कुनै जानकारी छैन ।  यसअघि बिहीबार बिहान लोसपा र एमालेका नेताहरुले वीरगन्जमा पत्रकार सम्मेलन गरेर महानगरमा दुवै दल बिच चुनावी तालमेल गर्ने सहमति भएको जानकारी गराएका थिए । 

महानगरको मेयर एमालेले र उपमेयर लोसपाले लिने गरि चुनावी तालमेल गर्ने सहमति भएको दुवै दलका नेताहरुको भनाइ थियो । महानगरका ३२ वटै वडामा भने आपसी सहमतिमा उम्मेदवार तय गर्ने दुवै दलले बताए थिए । पत्रकार सम्मेलनमा वितरण गरिएको विज्ञप्तिमा एमाले पर्साका अध्यक्ष जय प्रकाश थारु र लोसपा पर्सा अध्यक्ष पुरुषोत्तमलाल झाको हस्ताक्षर थियो ।