ढल्केवर(धनुषा) : धनुषा प्रहरीले लागुऔषध गाँजासहित एकजनालाई पक्राउ गरेको छ । पक्राउ पर्नेमा धनुषाको मिथिला नगरपालिका–६ ढल्केवर बस्ने ३१ वर्षीय किसुनदेव यादव रहेको प्रहरीले जनाएको छ । स्थानीय तह निर्वाचन लक्षित विशेष सुरक्षा योजनाअन्तर्गत प्रहरी चौकी बरमझियाबाट खटिएको प्रहरी टोलीले सवारी साधन चेकजाँच गर्ने क्रममा लागुऔषधसहित पक्राउ गरेको हो ।
धनुषाको सबैला नगरपालिका–१२ रघुनाथपुर नहरचोकस्थित बिरेन्द्रबजार–मैनाथपुर सडक खण्डमा शंकास्पद रुपमा डुमरियाबाट सबैलातर्फ आउँदै गरेको प्र २–०३–०१९प १९४२ नम्बरको मोटरसाइकलमा सवार किसुनदेवलाई रोकेर जाँच गर्दा गाँजा बरामद भएको धनुषाका प्रहरी प्रवक्ता प्रहरी नायब उपरीक्षक जितेन्द्र बस्नेतले जानकारी दिए ।
पिठ्युमा बोकेको कालो रंगको झोलामा लुकाइछिपाइ राखेको ५ केजी प्रतिबन्धित गाँजा बरामद भएको प्रहरी नायब उपरीक्षक बस्नेतले बताए । लागुऔषध ओसारपोसार कार्यमा प्रयोग गरेको मोटरसाइकलसहित किसुनदेवलाई नियनत्रणमा लिइ घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ ।
प्रतिक्रिया दिनुहोस !
