ढल्केवर(धनुषा) : धनुषाको मिथिला नगरपालिका–१ मा नेपाली कांग्रेसको प्यानल विजयी भएका छन्। वडाअध्यक्षमा नेपाली कांग्रेसका जोगी महतो ७७ मतान्तरले निर्वाचित भएका हुन्।
नेपाली कांग्रेस मिथिला नगरपालिकाको नगर सभापतिसमेत रहेका महतोले ७३५ मत ल्याएका छन्। उनका निकटतम प्रतिद्वन्द्धी निवर्तमान वडाअध्यक्षसमेत रहेका नेकपा एमालेका लक्ष्मी महतोले ६५८ मत पाएका छन्। मिथिला नगरपालिका वडा नं १ एमालेका मेयर उम्मेदवार राजाराम महतोको गृह गाउँ हो। अघिल्लो पटक एमालेका लक्ष्मी महतो वडाध्यक्षमा विजयी भएका थिए।
मिथिला नगरपालिकाको प्रमुख र उपप्रमुखमा पनि नेपाली कांग्रेसले अग्रता कायम राखेको छ। कांग्रेसका मेयर उम्मेदवार महेन्द्र महतोले ६६० मत ल्याएका छन् भने नेकपा एमालेका राजाराज महतो ६५९ मत पाएर पछ्याइरहेका छन्।
यस्तै, उपमेयरमा कांग्रेसकी निर्मला कोइराला ७२२ मत प्राप्त गरेर अग्रस्थानमा छिन्। उनलाई नेकपा एमालकी सुनिता सिंह बुढाथोकीले ६५४ मतका साथ पछ्याइरहेकी छन्।
प्रतिक्रिया दिनुहोस !
