युवतीलाई बिहेको प्रलोभन दिएर पटकपटक बलात्कार, ३ जना पक्राउ

वीरगन्ज : वीरगन्जमा एक युवतीलाइ बिहेको प्रलोभन दिइ पटकपटक जबरजस्ती करणी गरेको घटनामा संलग्नमा ३ जनालाई प्रहरीले पक्राउ गरेको छ । 

पक्राउ पर्नेहरुमा मोरङको कटहरी गाउँपालिका ४ घर भइ हाल वीरगन्ज ८ स्थित एक रेष्टुरेण्टमा काम गर्ने २५ वर्षीय सुरज साह ,जुम्लाको हेमा गाउँपालिका ३ का ३५ वर्षीय हरिचन्द्रनाथ योगी र संखुवासभाको खाँदवारी नगरपालिका १० घर भइ हाल वीरगन्ज १६ मा बस्ने ४२ वर्षीया लक्ष्मी बुढाथोकी कार्की रहेका छन् । 

प्रहरीका अनुसार , काठमाडौंकी २५ वर्षीया युवतीलाई साहले विवाह गर्ने प्रलोभन दिएर जेठ ५ गते वीरगन्जमा बोलाएर बसपार्कस्थित एक होटलमा लगि पटकपटक करणी गरेपछि वीरगन्ज १६ स्थित कार्की होटलकी सञ्चालितका लक्ष्मीको जिम्मा लगाई फरार भएका थिए । 

त्यसपछि जेठ १० गते लक्ष्मीले ती पीडित युवतीलाई बिहे गर्छु भन्ने प्रलोभन दिइ वीरगन्ज १६ फुलवारी टोलमा डेरा गरी बस्ने योगीको साथमा पठाएकी थिइन् । तर, योगीले पनि ती युवतीलाई आफ्नो कोठामा लगि मानसिक र शारीरिक यातना दिई पटकपटक जबरजस्ती करणी गरेर कोठामै थुनेर राखेका थिए । 

जेठ १४ गते राति ती युवती कोहि नभएको मौका छोपेर त्यहाँबाट भागेर आफन्तको सम्पर्कमा आएकी थिइन् । त्यसपछि आफन्तले घटनाबारे प्रहरीलाई जानकारी गराएपछि प्रहरीले आइतबार वीरगन्जका विभिन्न स्थानबाट ती तीनजना आरोपितलाई पक्राउ गरेको हो । 

पक्राउ परेका तीनैजनालाई जिल्ला प्रहरी कार्यालय पर्साको हिरासतमा राखेर जबरजस्ती करणी र मानव बेचबिखन तथा ओसारपसार कसुरमा अनुसन्धान भइरहेको पर्साका प्रहरी उपरीक्षक ओम प्रकाश खनालले जानकारी दिए ।