तारा एयरको विमान दुर्घटनामा एउटै टोलका सातजनाको मृत्यु : मृतक सबै आफन्त, सिंगो गाउँ नै शोकमा

ढल्केवर(धनुषा) : आइतबार बिहान पोखराबाट जोमसोमका लागि उडेको तारा एयरको जहाज सोमबार बिहान मुस्ताङको थासाङ गाउँपालिकाको सानोसरेमा दुर्घटनाग्रस्त अवस्थामा फेला परेको छ ।

उक्त जहाजमा सवार २२ जनाकै मृत्यु भएको छ ।

दुर्घटनाग्रस्त अवस्थामा भेटिएको तारा एयरको ९ एन एईटी विमानमा १३ नेपाली, ४ भारतीय, २ जर्मन नागरिक र चालकदलका तीन सदस्यसहित २२ जना सवार थिए । ती सबैको मृत्यु भएको घटनास्थलमा खटिएका प्रहरीले जनाएको छ ।

विमानमा धनुषाको मिथिला नगरपालिका–११ लोटा गाउँका सातजना सवार थिए ।

उनीहरु सबै आफन्त हुन् । विमानमा नेकपा एकीकृत समाजवादी पार्टीका धनुषा जिल्ला सदस्य समेत रहेका लोटाका राजन कुमार गोले, उनका बुवा इन्द्रबहादुर गोले, आमा राममाया तामाङ, काका पुरुषोत्तम गोले, काकी तुलसादेवी तामाङ, मामा मकरबहादुर तामाङ र माइजु सुकुमाया तामाङ सवार थिए ।

विमानमा चढ्नुअघि सामूहिक फोटो खिचाउँदै राजन गोलेसहितका आफन्त । तस्बिर :पारिवारिक स्रोत

उनीहरु मुक्तिनाथ दर्शनका लागि आइतबार पोखराबाट जोमसोम गइरहेका थिए । काठमाडौंको गोकर्णेश्वरमा बस्दै आएका राजनले केही दिनअघि परिवारका सदस्यलाई मुक्तिनाथ दर्शन गराउन लैजाने योजना बनाएका थिए । सोही योजनाअनुरुप गाउँबाट आमाबुबा, मामामाइजुसहितका आफन्तलाई लिएर शुक्रबार काठमाडौंहुँदै विमानबाट शनिबार पोखरा पुगेका थिए ।

आइतबार बिहान ९ बजेर ५५ मिनेटमा उनीहरुसहित १९ यात्रु बोकेर पोखराबाट जोमसोमको लागि उडेको तारा एयरको जहाज १० बजेर ७ मिनेटदेखि सम्पर्कविहीन भएको थियो । सोमबार बिहान क्षतविक्षत अवस्थामा भेटिएको उक्त जहाजमा सवार चालक दलका तीन सदस्यसहित सबै यात्रुको मृत्यु भएको पुष्टि भएको छ ।

गाउँले चढेको जहाज दुर्घटनाको खबरले स्तब्ध र सुनसान बनेको लोटा गाउँ ।

हिले घटनास्थलमा नेपाली सेना, शसस्त्र प्रहरीले स्थानीयको सहयोगमा शव संकलन भइरहेको छ। मृतकहरुको शव काठमाडौं ल्याएर परिवार आफन्तको जिम्मा लगाउने तयारी रहेको बुझिएको छ ।

धनुषाको चुरेक्षेत्रमा अवस्थित लोटा गाउँ शोकमग्न भएको छ । एउटै टोलका सातजनाको मृत्युले सिंगो गाउँ नै शोकमा डुबेको छ । मृतकका परिवार र आफन्तहरुमा रुवाबासी चलेको छ ।

आइतबार लोटा गाउँका सातजना सवार विमान सम्पर्कविहीन भएको खबर पाएलगत्तै मधेस प्रदेशका उद्योग पर्यटन वन तथा वातावरणमन्त्री शत्रुधन महतो लोटा गाउँ पुगेका थिए । परिवारजना र आफन्तहरुलाई सान्त्वना दिन लोटा पुगेका उनी आफैलाई सम्हाल्न सकेका थिएनन् ।

मन्त्री महतो संविधानसभा सदस्य हुँदा राजन उनको निजी सचिवालयमा रहेर काम गरेका थिए । राजनको परिवारसँग आफ्नो पारिवारिक सम्बन्ध समेत रहेको मन्त्री महतोले बताए ।
अहिले मृतकका परिवारलाई सान्त्वना दिन मिथिला नगरपालिकाका मेयर महेन्द्र महतो लोटा गाउँ पुगेका छन् ।