वर्दिवासका युवा लागुऔषध दुव्र्यसनविरुद्ध अभियानमा संगठित हुँदै

महोत्तरी : महोत्तरी वर्दिवासका युवाहरु लागुऔषध एवम् दुव्र्यसनविरुद्ध संगठित भएका छन् । 

पछिल्लो समयमा आएर स्थानीय युवाहरु संगठित भएर ‘सबैका लागि, सधैंका लागि’अभियानमार्फत लागुऔषध एवम् दुव्र्यसनविरुद्ध जनचेतना जगाउँदै आएका छन् । 

वर्दिवास नगरपालिकाका पूर्ववडाअध्यक्ष फल्गुनी सुस्लिङ्गको नेतृत्वमा युवाहरु ठाँउठाँउमा एकीकृत भएर समाजमा जनचेतना जगाउने कार्यमा तत्लिन देखाएका छन् ।

समयमै दिशानिर्देश नपाएकै कारण युवाहरु सफलता पाउन नसकेको अर्का युवा रवि निरौलाले बताए । अब हामी क्रमिकरुपमा यस अभियानलाई हरेक वस्तीमा लगेर जनचेतनामुलक सन्देश सम्प्रेषण गर्ने निरौलाले जानकारी दिए । 

युवाअवस्थामै लहलहमै लागेर कुलतमा फसेका युवाहरुलाई केन्द्रित गर्दै आफूहरु निःस्वार्थमा रुपमा संगठित भएको पूर्ववडाअध्यक्ष फल्गुनी सुस्लिङ्गले जानकारी दिए । 

सुस्लिङ्गले भने, 'प्रायः वाहरबाट शिक्षा लिनका लागि आएका युवाहरु यसको शिकार हुँदै गएको छ । त्यस्ता युवाहरुलाई बचाउनका लागि आफूहरु अभियान संचालन गरेको छु । यसमा सबैको सहयोगको आवश्यक रहेको छ । हरेकको सहयोग गरे यी अभियान निश्चित रुपमा सफलता हाँसिल गर्नेछ ।'

हरेकलाई यस अभियानमा सकारात्मक सोचका साथै सबैको हातेमालेको आवश्यकता रहेको पूर्वमेयर विदुरकुमार कार्कीले जोड दिए ।

 उनले भने, ‘यसभन्दा अगाडि पनि वर्दिवास नगरपालिकाले यस सम्बन्धमा सम्बन्धित सरोकारवाला निकायसमक्ष ध्यानाकर्षण गराइसकेको छ । फलस्वरुप गौशालामा प्रदेशस्तरीय सुधारगृहको निर्माण हुनु यसैको प्रतिफल रहेको छ । सडकको सुलभ व्यवस्था भएपछि वर्दिवास लगायतका युवाहरु सिमावर्तीक्षेत्रबाट लागुऔषध खरिद गरि प्रयोग गर्दै आएको छ । अव यस अभियानमा प्रहरी प्रशासनको समेत सकारात्मक भूमिकाको आवश्यकता रहेको छ ।'

वर्दिवास नगरपालिकाको कार्यालयले यस अभियानमा हरेकपक्षले सहयोग गरिने वर्दिवास नगरपालिकाका नवनिर्वाचित मेयर प्रल्हादकुमार क्षेत्रीले बताए । मेयर क्षेत्रीले भने, 'युवाको यस सकारात्मक अभियानमा नगरपालिकाको साथ रहनेछ । अगामी केही दिनमै प्रमुख जिल्ला अधिकारीको उपस्थितीमा जिल्लाका १५ वटै पालिका प्रमुखलाई छलफलमा सहभागी गराउनेछु । सोही निष्कर्ष अनुसारको कार्यान्वयन गर्नका लागि वर्दिवास नगरपालिका तयार रहेको छ ।’