उपेन्द्रको पक्षमा दुई तिहाइ पुगेको नेताहरुको दावी: भन्छन्- जसपा अब फुट्दैन
असार ३०, २०७९ बिहीबार १३:१२:०
वीरगन्ज : जनता समाजवादी पार्टी (जसपा) मा केन्द्रीय कार्यकारीणी अध्यक्ष उपेन्द्र यादवको पक्षमा झण्डै दुई तिहाइ बहुमत पुगेको छ ।
वीरगन्जमा बुधबारदेखि जारी यादव पक्षको केन्द्रीय समितिको बैठकमा अहिले कायम ४८९ केन्द्रीय सदस्यमध्ये २६७ जना सहभागी भइ हस्ताक्षार समेत गरिसकेका छन् ।
यस्तै, पार्टीका २३ जना संघीय संसदमध्ये १९ जना सहभागी छन् । संघीय परिषद् अध्यक्ष डाक्टर बाबुराम भट्टराईको पक्षमा भने उनी र महेन्द्र राय गरी दुईजना मात्र छन् । बाँकी दुई सांसद राजकिशोर यादव र अमृता अग्रहरी भने अहिलेसम्म कतै खुलेका छैनन् ।
यस्तै ३२ केन्द्रीय कार्यकारीणी सदस्य मध्ये २३ जना वीरगन्जको जारी बैठकमा सहभागी रहेका केन्द्रीय सदस्य समेत रहेका वन तथा वातावरणमन्त्री प्रदीप यादव बताउँछन् ।
मन्त्री यादव भन्छन्,' वीरगन्जमा जारी बैठकमा उपेन्द्र यादव जीको पक्षमा दुई तिहाइ पुगेको देखेपछि बाबुराम जीले हार मानेरै अब अर्को पार्टी खोल्ने निर्णय गरिसक्नु भएको छ ,अब जसपामा उहाको केहि चल्नेवाला छैन ।
केन्द्रीय कार्य समिति ४९९ भएपनि अहिले कायम संख्या ४८९ मात्रै भएको र ती मध्ये पनि ५० जना जति लोसपालगायत अन्य पार्टीमा लागि सकेकाले अब केन्द्रीय सदस्यको संख्या ४५० को हाराहारीमा मात्रै रहेको यादवले बताए । '
यादवले भने, '४५० मध्ये २६७ जना केन्द्रीय सदस्यले बैठकमा आएर हस्ताक्षर नै गरिसकेका छन् , २३ मध्ये १९ जना सांसद र ३२ मध्ये २३ जना केन्द्रीय कार्यकारिणी सदस्य पनि बैठकमा सहभागी छन्, यो संख्याले उपेन्द्रजीको पक्षमा झण्डै दुई तिहाइ बहुमत रहेको प्रमाणीत नै भइसकेको छ ।'
संघीय परिषद अध्यक्ष भट्टराईले अब पार्टी फुटाउने नभइ आफ्ना गुटका दुई चारजनालाई लिएर मात्रै अन्यत्र जान सक्ने अवस्थामा रहेको यादवले बताए ।
वीरगन्जको बैठकमा सहभागी अर्का केन्द्रीय सदस्य जनार्दन यादवले पनि वीरगन्जको बैठकमा सहभागीहरुको संख्याले जसपा अब फुट्ने नभइ विगतको भन्दा अझ सशक्त भएर अगाडि बढ्ने प्रष्ट भएको बताए ।
यादवले भने, 'हिजोको दिनमा डाक्टर बाबुरामले ४० प्रतिशत हिस्सा लिएर पार्टी एकता गर्नुभएको थियो , आज उहाँको साथमा २० प्रतिशतभन्दा पनि कम केन्द्रीय सदस्य लिएर अर्को पार्टी गठन गर्दै हुनुहुन्छ , यसले जसपालाई घाटा होइन फाइदा नै भएको छ ।'
डाक्टर भटटराईले विधान विपरित काठमाडौंमा बोलाएको बैठक सहभागी संख्याले नै अवैधानिक पुष्टि गरिसकेकाले भटटराई पक्षमा लागेकाहरुलाई समयमै सचेत हुन आग्रह पनि उनले गरे ।
यादवले भने,' समय अझै बाँकी छ , वीरगन्जको बैठक बिहीबार साँझसम्म चल्छ , उता लागेका नेताजीहरुलाई यताको ढोका अझै खुल्ला छ , अन्यथा पछि पश्चताप गर्नु बाहेक केहि हुनेवाला छैन । '
वीरगन्जमा बुधबारदेखि केन्द्रीय कार्यकारिणी अध्यक्ष उपेन्द्रले बोलाएको बैठकको उद्घाटन सत्रमा पनि बोल्ने नेताहरुले संघीय परिषद् अध्यक्ष भटटराईले विधान विपरित काठमाडौंमा बैठक बोलाएकोले त्यो बैठकको कुनै तुक नभएको बताएका थिए ।
जसपाका वरिष्ठ नेता अशोक राईसहित केन्द्रीय कार्यकारिणी सदस्यहरुले विधान विपरित बैठक बोलाएर पार्टीमा भाँडभैलो मच्चाउन खोज्ने भटटराईसहित उनको बैठकमा सहभागीलाई अनुशासनको कारवाही गर्न अध्यक्ष उपेन्द्रसँग आग्रह पनि गरेका थिए ।
बिहीबार जारी बैठकको बन्द सत्र साँझसम्म चल्ने र बैठकले अन्तिममा विधान विपरित छुट्टै बैठक बोलाउने भटटराईसहितका नेतालाई कारवाहीको निर्णय गर्ने बैठकमा सहभागी एक केन्द्रीय सदस्यले बताए ।
वीरगन्जमा बिहीबार जारी जसपाको उपेन्द्र यादव पक्षको केन्द्रीय समिति बैठकको बन्द सत्रमा सहभागी शीर्ष नेताहरु । तस्बिर : क्रान्ति शाह
प्रतिक्रिया दिनुहोस !
