महोत्तरीमा एक वर्षमा विपदमा परी करोडौंको क्षति, २० जनाको मृत्यु
साउन ८, २०७९ आइतबार ८:३:०
महोत्तरी : महोत्तरीमा विपदका कारण करोडौंको क्षति भएको छ। जिल्ला प्रहरी कार्यालय महोत्तरीका अनुसार गत आर्थिक वर्षमा विपदकै कारण ४६ करोडभन्दा बढीको क्षति भएको हो।
आर्थिक वर्ष २०७८-०७९ मा विभिन्न समयमा भएको विपदमा ४६ करोड २८ लाख २८ हजार ५ सय रकम बराबर क्षति भएको छ। प्रहरी स्रोतका अनुसार सबैभन्दा बढी आगलगीको कारण ४१ करोड ३९ लाख ३१ हजारको क्षति भएको छ। त्यस्तै अविरल वर्षाका कारण ४ करोड ६५ लाख ५० हजार बराबरको क्षति भएको जिल्ला प्रहरी कार्यालय महोत्तरीले जनाएको छ। यता विद्युतीय प्रवाह भइ करेन्ट लाग्दा १४ लाख २२ हजार ५ सयको क्षति भएको छ भने हावाहुरीको कारण ९ लाख २५ हजारको क्षति भएको हो।
विपदले २० जनाको मृत्यु
गत आर्थिक वर्षमा विभिन्न किसिमको विपदमा परी २० जनाको मृत्यु भएको छ। मृत्यु हुनेमा ५ महिला, ५ पुरुष र १० जना बालबालिका छन्। प्रहरीले दिएको जानकारी अनुसार विपद सम्बन्धी घटना पानीमा डुबेर सबैभन्दा बढी बालबाललिकाको ज्यान गएको छ। यसअवधिमा ८ जना बालबालिका , ३ पुरुष र १ महिला गरी १२ जनाको पानीमा डुबेर मृत्यु भएको हो। त्यस्तै करेन्ट लाग्दा २ महिला, १ पुरुष र २ बालबालिका गरी ५ जना, बाढीमा १ महिला र १ पुरुष गरी २ जना र आगलागीमा परेर एक जना महिलाको मृत्यु भएको प्रहरी प्रवक्ता डिएसपी प्रकाश विष्टले जानकारी दिए। यस्तै सोही घटनामा १५ जना घाइते भएका छन्। घाइते हुनेमा ९ महिला, ४ पुरुष र २ बालबालिका रहेका छन्।
विपदका घटनामा ७ चौपायाको घटनास्थलमै मृत्यु भएको छ। आगलगीमा ५ र करेन्ट लागेर २ चौपायाको मृत्यु भएको हो। त्यस्तै आगलगीमा २ चौपाया घाइते भएका जिल्ला प्रहरी कार्यालय महोत्तरीले जनाएको छ।
६ सय २४ घरमा पूर्ण क्षति
सो विपदको कारण ६२४ वटा घरमा पूर्ण रुपले क्षति भएको छ। जसमा आगलगीका कारण १४, करेन्ट लागेर ५, अविरल वर्षाको कारण ६ सय ५ वटा घर क्षति भएको जिल्ला प्रहरी कार्यालयले जनाएको छ। त्यस्तै हावाहुरीको कारण १७ वटा घरमा आशिंक क्षति भएको छ।
प्रतिक्रिया दिनुहोस !
