विकास निर्माणका क्षेत्रमा जनअपेक्षाअनुसार काम गर्छु: गिरिराजमणि पोखरेल

महोत्तरीमा चुनावी सरगर्मी बढेको छ । महोत्तरी १ मा सत्ता गठबन्धनबाट नेकपा मा‌ओवादी केन्द्रका उपमहासचिव गिरिराजमणि पोखरेल उम्मेदवार छन् । उनले विगतमा आफूले ल्याएर योजनालाई सफल बनाउन तथा जनताका पक्षमा काम गर्न फेरि आफ्नै जित हुने दावी उनको छ । 

पोखरेलको विगतको कामको समीक्षासँगै जिल्लामा माओवादी कमजोर भइरहेका बेला पोखरेलको उपस्थिति कस्तो हुन्छ भन्ने विषयमा अन्नपूर्णकर्मी धनवीर महतोले गरेको कुराकानीको सम्पादित अंश:
 

तपाइँलाई भोट किन दिने ?
यो क्षेत्रको विकासका लागि नै मलाई भोट मागिरहेको छु । जनतासँग पनि यही प्रतिबद्धता गरिरहेको छु । यहाँको शिक्षा र स्वास्थ्य विकासमा मेरो योगदान हुनेछ । स्वास्थ्य र शिक्षाको पहुँचबाट कोही पनि छुट्न नपरोस् भन्ने लक्ष्यसहित म काम गर्नेछु । विगतमा पनि गरेको छु । जनताका धेरै अपेक्षा छन् । विकास निर्माणका काममा म जनअपेक्षा अनुसार काम गर्छु ।

ठूला विकासका परियोजनासहित महोत्तरीलाई समृद्ध बनाउने गरी म काम गर्छु । यसरी महोत्तरीको समग्र विकास र महोत्तरीबासीको क्षमता विकासका क्षेत्रमा मेरो ध्यान जानेछ ।

म चौथौपटक यो क्षेत्रको विकास गर्ने उद्देश्यसहित उम्मेदवार बनेको छु । मैले दुई पटकको जनमत संविधान निर्माणमा खर्च गरेँ । त्यस समयमा भूकम्प, मधेस आन्दोलनलगायतले विकासका क्षेत्रमा सोचे जस्तो काम भएन । त्यतिबेला सोचेका कामलाई पूर्णता दिन यसपटक जनताले मत दिनुहुन्छ भन्ने विश्वस्त छु ।

यही समयमा मैले शिक्षामन्त्री भएर काम गरेँ ।  त्यतिबेला देशकै गौरवको रुपमा परिचित रहेको बर्दिवास मेडिकल कलेजको प्रक्रियाको शुभारम्भ भयो । देशमै एकमात्र गौरवको विषय गौशाला आयुर्वेदिक शिक्षालय र रेल्वे ईन्जिनियर पढाईका लागि गौशालामा ईन्जिनियरिंग कलेजमा पठनपाठनको योजना अघि बढेको छ । निगौल गाई गौशालामा गाईको अनुसन्धान र पशु तथा कृषि शिक्षाको लागि नगरपालिकाको समन्वयनमा चितवनको रामपुर कलेजको आंगिक कलेजको रुपमा पठनपाठन गराउने प्रक्रिया अन्तिम चरणमा छन् । सँगै यस क्षेत्रमा अरु धेरै विकासका योजना छन् । यी सफल पार्न जनताले मलाई मत दिनुहुन्छ भन्नेमा विश्वस्त छु ।

बिगतमा गठबन्धनसहित पार्टी एकीकरण गर्दा पनि जुट्न नसक्नुभएका तपाइँहरूले अहिलेको गठबन्धनलाई कति टिकाउनुहुन्छ?
हामी ५ दलीय गठबन्धन मिलेर चुनावी प्रतिस्पर्धामा छौँ । सिट बाँडफाँड गरेर देशभर चुनावी प्रतिस्पर्धामा छौँ । यो गठबन्धनकै आधारमा देशले बहुमतको सरकार पाउनेछ । यसमा कुनै संकोच छैन । यो राजनीतिक संस्कार हो, जहाँ आवश्यकताअनुसार परिवर्तन हुनुपर्छ । अहिले देशलाई विकासको माध्यमले निकास दिन गठबन्धन आवश्यक हो । 

अर्को ०७४ सालमा प्रतिनिधि सभा र प्रदेश सभा सदस्य निर्वाचनमा तत्कालिन नेकपा एमाले र नेकपा माओवादीबीच चुनावी एकताले तत्कालिन समयमा केपी शर्मा ओलीको नेतृत्वमा झण्डै दुई तिहाईको सरकार बन्यो । तत्पश्चात नेकपा एमाले र नेकपा माओवादी केन्द्र मिलेर नेपाल कम्यु्निष्ट पार्टी (नेकपा) नामक पार्टी गठन भयो । अध्यक्षद्वय केपी शर्मा ओली र पुष्पकमल दाहाल ‘प्रचण्ड’ ले नेतृत्व गरेको सो पार्टीले तत्कालिन समयमै देशका लागि बहुप्रतिक्षीत एवम् दीर्घकालिन योजना जनतासमक्ष पस्किन पाएका थियौ । 

समयको क्रमसँगै केपी ओली गुटकै कारण एकीकृत भएको पार्टी पूर्ववत रुपमा फर्किनुपर्यो । हामीले ल्याएका योजना पनि बीचमै अड्किए । त्यो छोटो समयको गठबन्धन भयो । यो गठबन्धन त्यस्तो हुँदैन । यसको आयु भने लामो नै रहनेछ । अहिले देशको मुहार परिर्वतन गर्नका लागि सतारुढ गठबन्धनको अति नै आवश्यक छ । 

धेरैले माओवादी पार्टी नै छाडे, त्यसमा पनि स्थानीय तह निर्वाचनमा माओवादीको मत खासै उल्लेख गर्न योग्य छैन । यस्तो अवस्थामा तपाइँको जित्ने आधार के ?

हामी सतारुढ दलका ५ दलीय गठबन्धन भएपछि बलियो छौँ । हाम्रा गठबन्धनले देशभर भारी बहुमत प्राप्त गर्नेछ । कुरा रह्यो पार्टी परित्याग गरेका व्यक्तिहरुको सन्दर्भमा । त्यतिबेला नेकपा कायम रहेको समयमा अध्यक्ष केपी शर्मा ओलीले विद्रोह गरेपछि केही नेताहरु पार्टी छाडेर गएका छन् । तर उहाँहरु जति स्पीडमा पार्टी प्रवेश गर्नुभयो, त्यति नै स्पीडमा पार्टीबाट फर्किदै हुनुहुन्छ । 

नेपाली राजनीति शब्दमा भन्नुपर्दा उहाँहरु फाँसीवादको चपेटामा फसेको अनुभव गर्दैछ । वाक्क भएर फर्किंदैछ । महोत्तरीका टेकबहादुर वलम्पाकी माओवादीमै फर्किए भने रौतहटका प्रभु साह अहिले एमाले परित्याग गरी स्वतन्त्रबाट चुनावमा उत्रिएका छन् । 

अर्को कुरा स्थानीय निर्वाचन र प्रतिनिधि सभा र प्रदेश सभा निर्वाचनबीचमा धेरै फरक छ । त्यस चुनावमा जनताले स्थानीय मुद्दा सम्बोधन गराउनमा तत्लिन रहन्छन् भने यस निर्वाचनमा राष्ट्रिय एवम् दीर्घकालका मुद्दा सम्बोधन गराउन चाहन्छन् । दक्ष, अनुभवी, प्रखरवक्ता अनि जुझारु नेतालाई यस निर्वाचनमा आमनागरिकले रुचाएका हुन्छ । अहिलेको मतदाताले हरेक विषयवस्तुलाई मनन गर्दै अगाडी बढेका हुन्छ । त्यसैले स्थानीय निर्वाचनमा जे जति कारणले उम्मेदवार पराजय हुनुभयो । मैले ती चुनावमा भएका कमी कमजोरीलाई सच्याउने कोशिस पनि गरेको छु । त्यसकारण चुनावमा विजयी हुने लगभग निश्चिय नै छ । 

म जोडका साथ के भन्छु भने विकासप्रेमी, संसदमा आफनो क्षेत्रको लागि आवाज उठाउन सतारुढ गठबन्धनका साझा उम्मेदवारलाई विजयी गराउनुपर्ने आवश्यक छ । अहिलेको परिस्थितिमा आममतदाताले निष्पक्ष, निडर, सोच विचार गरेर मतदान गर्न आग्रह गर्छु ।