मेरो काम देखेर मलाई नै मत दिनुहुन्छ भन्नेमा विश्वस्त छु: शारदादेवी थापा

महोत्तरी: शारदादेवी थापा महोत्तरी क्षेत्र नम्बर १ ‘क’बाट प्रदेश सभा सदस्यको उम्मेदवार हुन् । नेकपा एमालेकी नेतृ थापा प्रदेश सभामा दोहोरिने योजनासहित चुनावी मैदानमा छन् । उनका चुनावी एजेण्डा, विगतको कामको समीक्षा र मतदाताको थापासँगका अपेक्षालगायतका विषयमा अन्नपूर्णकर्मी विजयकुमार सिंहले गरेको कुराकानीको सम्पादित अंश:

तपाइँको निर्वाचन क्षेत्रमा चुनावी वातावरण कस्तो छ?

हामी चुनावी अभियान लिएर घरदैलोमा छौँ । सबैले नेकपा एमालेलाई खोज्नुभएको छ। यो देखेर हामीलाई पनि उत्साह बढेको छ । प्रत्येक घरमा हामीलाई फूलमाला लिएर बाटो कुरिरहेको देखेर आत्मविश्वासका साथ मनैबाट जनतामा एमालेप्रति उत्साह र आशा जागेको पाएँ ।

भुँई मान्छेलाई सम्बोधन गरेर एमालेले योजना बनाएकाले पनि जनतामा यस्तो उत्साह आएको होला । एमालेले विगतमा गरेका काम, विभिन्न ८ सामाजिक सुरक्षा भत्ताका कार्यक्रमलगायतले एमालेमा आकर्षण बढेको छ । 

अब पनि हामीले स्वरोगजार, स्थानीय तहमै रोजगारीका अवसर, दुर्व्यसनी मुक्त समाज, छुवाछुतविरुद्धको अभियान चलाएर समाजलाई समृद्ध बनाउने योजनामा छौँ ।

जनताले तपाइँलाई भोट किन दिने ?
म दोस्रो कार्यकालका लागि मत माग्दैछु । पहिलोपटक मलाई चिनाउन परेको थियो । त्यतिबेला म जिल्ला कमिटीमा थिएँ र अखिल नेपाल महिला संघ जिल्ला कमिटीको अध्यक्षको रुपमा काम गर्दा अहिले मेरो परिचय बढेको छ ।

अब मेरो दोस्रो परिचय भनेको पार्टीसँगै जनप्रतिनिधिको पनि छ। मैले अहिले मतदाता कहाँ चिनाउन परेको छैन। उहाँहरूले नै मलाई सम्बोधनसहित बोलाउनुहुन्छ। मतदाताले मलाई स्वीकार गरिसक्नुभएको छ । मलाई जिताउनुहुन्छ भन्नेमा विश्वस्त छु ।

हामीले पार्टीको एजेण्डामा २० बुँदालाई प्राथमिकतामा राखेका छौँ । गरिबी निवारण, युवाको क्षमता विकास, कृषिमा आधुनीकीकरण, भौतिक पूर्वाधारको विकासलगायतका कुरालाई जोडतोडले उठाउन मेरो नेतृत्व चाहिन्छ । यहाँका आम नागरिकसँग मैले यही भनेर भोट मागिरहेकी छु।

सत्ता गठबन्धनले आफू सशक्त भएको दावी गरिरहँदा तपाइँहरू कसरी अगाडि ?

सत्ता गठबन्धनले अहिले गरिरहेको काम त जनताले हेरेकै छन् । एमालेका एजेण्डा पनि राम्ररी बुझेका छन् । सरकार सञ्चालनमा एमालेको आवश्यकता महसुस भएकै छ । विगतमा मैले गरेका कामलाई पनि यहाँका मतदाताले राम्ररी मूल्यांकन गरेका छन् । त्यसैले जसले जे दावी गरे पनि यहाँको चुनावी महौल, जनताले मसँग गरेका अपेक्षा र मेरो काम र योजनालाई पूर्णता बनाउन उहाँहरूले मलाई नै भोट गर्नुहुन्छ भन्नेमा म ढुक्क छु । गठबन्धनका उम्मेदवारले जित्छु भनेर दावी गर्नु स्वभाविक हो।