जनताले चाहेरै निर्वाचनमा होमिएको हुँ: लक्ष्मी महतो

गौशाला: महोत्तरी-१ मा एमाले र जसपाको गठबन्धनबाट प्रतिनिधि सभा सदस्यको उम्मेदवार बनेका नेता लक्ष्मी महतो चुनावी मैदानमा होमिएका छन् ।

जनताको चाहानाकै कारण निर्वाचनमा होमिएको बताउने उनको सत्ता गठबन्धनका उम्मेदवार गिरिराजमणि पोखरेलसँग कडा प्रतिस्पर्धा हुने देखिन्छ । गत निर्वाचनमा पोखरेलसँग पराजित भएका महतोका यसपटक जित्ने योजना के के छन्? अन्नपूर्णकर्मी धनवीर महतोले एमाले नेता महतोसँग गरेको कुराकानीको सम्पादित अंश:

तपाइँलाई जनताले भोट किन दिने ?

 मैले जनताको चाहनाअनुसार महोत्तरी क्षेत्र नं. १ मा प्रतिनिधि सभा सदस्य पदको उम्मेदवारी दिएको छु । यसपटक जनता समाजवादी पार्टी र नेकपा एमालेकोतर्फबाट मेरो साझा उम्मेदवारी । 

मैले विगतदेखि नै जनभावना अनुसार काम गरेको छु। सबैको सुखदुःखको सारथी भएर काम गरेको छु । आवश्यकता अनुसार नगद वा अन्य भौतिक सहयोग मैले सकेको गरेको छु । विगतमा मैले गरेको सहयोग र आगामी दिनमा मैले ल्याएका योजनालाई सार्थक बनाउन जनताले मलाई भोट दिनुहुन्छ ।

तपाइँसंग जनताका अपेक्षा के छन्?
जनताका अपेक्षा धेरै छन् । ती अपेक्षालाई सूचीबद्ध गरेर प्राथमिकता अनुसार कार्यान्वयन गर्नुपर्छ । यसअघि जितेर गएका जनप्रतिनिधिले बाँडेको आश्वासनले जनताले नेतालाई पत्याउनै छाडिसके । भेट्दा पनि दिक्क मान्ने गरेका छन् । गाउँ ठाउँको विकास नभएको गुनासो धेरै छ । यी नै गुनासालाई मैले सम्बोधन गर्नुपर्नेछ । म झुटो आश्वासन दिएर काम नगर्ने होइन् । सकेको काम गर्छु भनेर प्रतिबद्धता गर्छु र सोही अनुसार काम गर्छु । मेरो विगतको पृष्ठभूमि हेरेर पनि जनताले थाहा पाउनुभएको छ।

मैले अरु समयमा र चुनावी अभियानमा पनि घरदैलो गर्दा जनताको अवस्था अभावै अभाव र पीडादायी बनेर बितेको छ । किसानलाई मल अभाव छ । विद्यालयमा किताव छैन, शिक्षकको अभाव । अस्पतालमा डाक्टर र औषधि छैन । सडकको अवस्था उस्तै छ । गाँउघरमा सिंहदरवार कहानी जस्तो मात्र छ । यी समस्या को हल गर्न जनताले मसंग अपेक्षा राखेका छन् । यी जनताका अपेक्षा मैले पूरा गर्नुछ ।

तपाइँको चुनाव जित्ने आधार के ?
म उधारो अनि धेरै आश्वासन बाँड्दिन। म बोल्ने मात्र होईन गरेर देखाउने हो । त्यसैले मैले सबैलाई धेरै गर्छु भनेको छैन। मलाई विश्वास गर्नुहोस् मात्र भनिरहेको छु । म पहिले समाजसेवी अनि मात्र नेता हुँ । चुनाव जिते पनि नजिते पनि समाजसेवीको रुपमा काम गरिनैरहनेछु । म जनभावनाअनुसार विकासको पथमा अगाडि बढिरहनेछु । म जनप्रतिनिधिको रुपमा नेतृत्व गर्दा जनचाहनाअनुसार सामाजिक विकास, भ्रष्टाचारमुक्त अनि जनमैत्री सुशासन स्थापित गर्नु नै मेरो दीर्घ लक्ष्य रहनेछ । यी नै आधारले मलाई जित नजिक पुर्‍याएको छ ।