महोत्तरी: मधेस प्रदेश प्रहरी कार्यालय जनकपुरधामले आजको प्रतिनिधि सभा र प्रदेश सभा निर्वाचनलाई लक्षित गर्दै २३ हजारभन्दा बढि म्यादी प्रहरीलाई निर्वाचनस्थलमा खटाईएको छ।
निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न प्रदेशभर २३ हजार ७७१ म्यादी प्रहरीलाई खटाईएको छ ।
प्रदेश प्रहरी कार्यालयका स्रोतका अनुसार सबैभन्दा धेरै धुनषामा ३ हजार ४८६ म्यादी प्रहरी खटाईएको छ । त्यस्तै सबैभन्दा कम पर्सामा २ हजार ७ जना म्यादी प्रहरीलाई खटाइएको छ ।
सर्लाहीमा ३ हजार ३०७, सप्तरीमा ३ हजार २७८, बारामा ३ हजार १४४, रौतहटमा २ हजार ९३९, सिरहामा २ हजार ८०९, महोत्तरीमा २ हजार ८०१ म्यादी प्रहरी खटाईएको मधेस प्रदेश प्रहरी कार्यालयका प्रहरी प्रवक्ता प्रहरी उपरिक्षक सुमन कुमार तिम्लिसिनाले जानकारी दिए ।
निर्वाचन सुरक्षा निकायले मधेस प्रदेशमा २ हजार १५६ मतदानस्थल र ४ हजार २३५ मतदानकेन्द्र निर्धारण गरिएकोमा अधिकांश मतदानस्थल र मतदान केन्द्रलाई अतिसंवेदनशीलको सूचीमा राखिएको छ ।
सुरक्षा निकायले मधेस प्रदेशका मतदानस्थल र मतदानकेन्द्रलाई तीन समूहमा वर्गीकरण गर्दा १ हजार २३० वटा मतदानस्थल र २ हजार ४७२ मतदान केन्द्रलाई अतिसंवेदनशीलमा वर्गीकृत गरिएको मधेस प्रदेश प्रहरी कार्यालयले जनाएको छ। यस्तै, ७७९ मतदानस्थल र १ हजार ४९८ मतदानकेन्द्र संवेदनशील, १४७ मतदानस्थल र २६५ मतदानकेन्द्र सामान्य रहेको प्रवक्ता प्रहरी उपरीक्षक सुमन कुमार तिम्सिनाले जानकारी दिए।
सुरक्षा निकायले विगतको चुनावमा भएको गतिविधिलगायत विभिन्न आधारमा मतदानकेन्द्र र मतदानस्थलको वर्गीकरण गरेका हुन्। मधेस प्रदेशमा निर्वाचन सुरक्षाका लागि नेपाल प्रहरी, सशस्त्र प्रहरी तथा नेपाली सेनालाई खटाइएको मधेस प्रदेश प्रहरी कार्यालय जनकपुरधामले जनाएको छ ।
प्रतिक्रिया दिनुहोस !
