जोमसोम: मुस्ताङमा तीन जना उम्मेदवारको धरौटी जफत भएको छ । प्रतिनिधि सभातर्फ दुई जना र प्रदेश सभातर्फ एक जनाको धरौटी जफत भएको सहायक निर्वाचन अधिकृत मुकुन्द आचार्यले जानकारी दिए ।
प्रतिनिधि र प्रदेश सभा निर्वाचनमा खसेको मतको १० प्रतिशत पाउँन नसकेमा उम्मेदवारको धरौटी जफत भएको हो । मुस्ताङमा प्रतिनिधि सभातर्फ राष्ट्रिय स्वतन्त्र पार्टीका उम्मेदवार सुदेश गुरुङ र राष्ट्रिय प्रजातन्त्र पार्टीका उम्मेदवार प्रवीण शेरचनको जमानत जफत भएको आचार्यले बताए।
‘उम्मेदवारले खसेको मतको १० प्रतिशत मत नल्याए धरौटी रकम जफत हुन्छ,’ आचार्यले भने । प्रतिनिधि सभातर्फ मुस्ताङमा १० हजार ९५७ मतदाता मध्ये ७ हजार २५८ मत खसेको थियो ।
यसैगरी मुस्ताङ प्रदेश(२)मा राप्रपा नेपालकी एक्ली महिला उम्मेदवार कर्म डोल्कर गुरुङको पनि धरौटी जफत भएको छ । ७ हजार ४१४ मतदाता मध्ये ५ हजार ३४६ मत खस्दा राप्रपा नेपालकी उम्मेदवार कर्म डोल्कर गुरुङले ५८ मत अर्थात शून्य दशमलव ८७ प्रतिशत प्राप्त गरेकी थिईन् ।
मुस्ताङमा ४ राजनीतिक पार्टीका ९ जना उम्मेदवार प्रतिनिधि र प्रदेशसभा निर्वाचनमा उम्मेदवार थिए ।
प्रतिक्रिया दिनुहोस !
