विराटनगर : प्रदेश १ को राजधानी विराटनगरमा अवैध घरेलु मदिराको उत्पादन र बिक्री वितरणमा प्रहरीले कडाइ गर्न थालेको छ ।
अवैध मदिरा नियन्त्रणका लागि प्रहरीले सक्रियता बढाएको हो । ठाउँठाउँमा भट्टी नै सञ्चालन गरेर घरेलु मदिरा उत्पादन गर्दै बिक्रीका लागि बजारसम्म पुर्याउने गरेको पाइएपछि प्रहरी कडा रूपमा प्रस्तुत भएको मोरङ प्रहरी प्रमुख एसपी शान्तिराज कोइरालाले बताए ।
‘कानुनले घरेलु मदिरालाई अवैध मानेको छ । उत्पादन,ओसारपसार र बिक्रीमा रोक लगाएको छ,'उनले भने,‘तर,व्यावसायिक रूपमा उत्पादन हुने गरेको पाइयो । नियन्त्रणका लागि प्रहरी सक्रियता बढाइएको छ ।’
अवैध मदिरा उत्पादनस्थलमा निगरानी बढाउँदै नियन्त्रणमा लिन ‘विशेष अभियान’चलाइएको कोइरालाले बताए । उनका अनुसार अवैध मदिरा र मदिरा उत्पादनका लागि प्रयोग गरिने कच्चा पदार्थ तथा भाँडावर्तन नियन्त्रणमा लिने गरिएको छ । यसको धन्दामा संलग्नलाई आगामी दिनमा पुनः उत्पादन गरिए कारबाही अघि बढाउने चेतावनी प्रहरीले दिएको छ ।
विराटनगर महानगरपालिका–१२ मंगलबारेमा प्रहरीले शुक्रबार बिहान छापा हानेर प्रतिबन्धित घरेलु मदिरा बनाउन प्रयोग गरिने कच्चा पदार्थ र तयारी मदिरा नियन्त्रणमा लिएको छ । घरेलु मदिरा बनाएर बेचबिखन गरिरहेको सूचनाका आधारमा वडा प्रहरी कार्यालय विराटनगरका डीएसपी दीपेन्द्र पञ्जियार थारु नेतृत्वको टोलीले मदिरा उत्पादनस्थलमा छापा हानेको हो ।
घरेलु मदिरा बनाउन प्रयोग गरिने कच्चा पदार्थ,भाँडावर्तन र तयारी मदिरा प्रहरीले बरामद गरेको छ । प्रहरीले २ हजार ८ सय ८० लिटर कच्चा पदार्थ, १ सय २५ लिटर तयारी र मदिरा बनाउन प्रयोग गरिएका ३१ थान भाँडावर्तन नियन्त्रणमा लिएको एसपी कोइरालाले बताए ।
उनका अनुसार २ लाख ४ हजार बढी मूल्यका सामान बरामद गरेर आवश्यक कारबाहीका लागि आन्तरिक राजस्व कार्यालय विराटनगरमा बुझाइएको छ ।
प्रतिबन्धित घरेलु मदिराका कारण झैझगडा र घरेलु हिंसाका घटना बढेको प्रहरीको निस्कर्ष छ । अपराधिक घटना र विभिन्न खालका हिंसा रोक्न घरेलु मदिरा नियन्त्रणलाई प्राथमिकतामा राखिएको कोइरालाको भनाइ छ । व्यावसायिक हिसाबले प्रतिबन्धित मदिराको उत्पादन हुन नदिन विभिन्न निकायसँग पनि समन्वय भइरहेको उनले बताए ।
प्रतिक्रिया दिनुहोस !
