मुस्ताङको तेज निरला जनहित क्याम्पसमा स्ववियु निर्वाचनको मतदान जारी
चैत ५, २०७९ आइतबार १२:४१:३
जोमसोम :हिमाली जिल्ला मुस्ताङको तेज निरला जनहित बहुमुखी क्याम्पस स्ववियु मतदान जारी छ। बिहान ११ बजेसम्म ६० प्रतिशत मतदान सकिएको छ । बिहान ८ बजे सुरू भएको स्ववियु निर्वाचनको मतदानमा ४२ जना मतदातामध्ये २५ जना मतदान गरेको स्ववियु निर्वाचन कमिटीले जनाएको छ ।
मुस्ताङमा स्ववियु मतदानका लागि दिउँसो ४ बजेसम्म मतदानकार्य जारी रहने कार्यतालिका छ । स्ववियु निर्वाचनका लागि क्याम्पसको निर्माणधिन नयाँ भवनको कम्पाउण्डमा मतदान स्थल तोकिएको हो । प्रहरी र प्रशासनको सुरक्षा निगरानीमा स्ववियु निर्वाचन शान्तिपूर्ण भयरहित वातावारणमा मतदानकार्य अघि बढाईएको स्ववियु मुख्य निर्वाचन अधिकृत आदित्यचन्द्र थकालीले जानकारी दिए ।
मुस्ताङमा स्ववियु निर्वाचनमा नेपाली कांग्रेस समर्थित नेपाल विद्यार्थी संगठन,नेकपा एकीकृत समाजवादी समर्थित अनेरास्ववियु र नेकपा माओवादी विप्लप समूहको अखिल क्रान्तिकारी विद्यार्थी संगठनले लोकतान्त्रिक बाम विद्यार्थी गठबन्ध गरेर स्ववियु निर्वाचनमा होमिएका छन् । नेकपा एमाले समर्थित अनेरास्ववियु विद्यार्थी संगठनले एक्लै प्रतिस्पर्धा गरेका छन् ।
स्ववियु निर्वाचन कमिटीका अनुसार प्रत्यक्ष तर्फ ५ र समानुपातिकतर्फ ६ जना पदाधिकारीका लागि निर्वाचन प्रतिस्पर्धा भइरहेको छ । जसअन्तर्गत प्रत्यक्षतर्फ अध्यक्ष पद र ३ सदस्य पदका लागि मतदान हुन लागेको हो। यसअघिनै एमाले समर्थित अनेरास्ववियुका उम्मेदवारले मनोनयपत्र फिर्ता लिएसँगै नेविसका सचिव पद र कोषाध्यक्ष पद निर्विरोध निर्वाचन भएका हुन् ।
स्ववियु समानुपातिकतर्फ अनेरास्ववियु (एमाले)बाट ५ जना र लोकतान्तिक बाम विद्यार्थी संगठनबाट ४ जना चुनावी मैदानतमा उत्रिएका छन्।
मुस्ताङको एकमात्र तेज निरला जनहित बहुमुखी क्याम्पसमा व्यवस्थापन संकायको पढाइ हुँदै आएको छ।
प्रतिक्रिया दिनुहोस !
