ढल्केवर(धनुषा) : धनुषामा लागूऔषधसहित एक जनालाई प्रहरीले पक्राउ गरेको छ। पक्राउ पर्नेमा धनुषाको गणेशमान चारनाथ नगरपालिका–१ बस्ने २४ वर्षीय अजय कुसैत यादव रहेको प्रहरीले जनाएको छ।
आफ्नै घरमा लागूऔषध बिक्री वितरण गर्दै आएको सूचनाका आधारमा इलाका प्रहरी कार्यालय ढल्केवरबाट खटिएको प्रहरी टोलीले यादवलाई उनको घरबाट लागूऔषधसहित पक्राउ गरेको हो।
उनको घर खानतलासी गर्दा एक्सिप्लोन १०० एमएल लेखिएको ७३ बोतल, नाइट्राभेट–१० लेखिएको ११ पत्तामा १५४ वटा ट्याब्लेट, स्पासोम प्रोक्सिभोन प्लस लेखिएको ९ पत्तामा ६४ क्याप्सुल, स्याम्पेक्स लेखिएको ४ पत्तामा ३२ वटा क्याप्सुल बरामद भएको धनुषाका प्रहरी प्रवक्ता प्रहरी नायव उपरीक्षक वेदप्रसाद गौतमले जानकारी दिए।
प्रतिबन्धित लागूऔषधसहित पक्राउ परेका यादवलाई लागूऔषध मुद्दामा १० दिनको म्याद थप भई अनुसन्धान भइरहेको प्रहरी नायव उपरीक्षक गौतमले जनाए।
प्रतिक्रिया दिनुहोस !
