ढल्केवर(धनुषा) : धनुषामा टिप्परको ठक्करबाट एक बालकको मृत्यु भएको छ भने एक बालिका गम्भीर घाइते भएकी छन्।
टिप्परको ठक्करबाट धनुषाको सबैला नगरपालिका–१२ रघुनाथपुर सिर्खाटोलका ७ वर्षीय बालक रियान दनुवारको मृत्यु भएको प्रहरीले जनाएको छ।
दुर्घटनामा सोही ठाउँ बस्ने ५ वर्षीया राधीकुमारी दनुवार घाइते भएकी हुन्। उनको टाउको र शरीरको विभिन्न भागमा गम्भीर चोट लागेको बताइएको छ।
उनलाई स्थानीय स्वास्थ्य केन्द्रमा सामान्य उपचारपछि प्रादेशिक अस्पताल जनकपुर पठाइएको प्रहरीले जनाएको छ। सोमबार सिर्खाटोलस्थित सडकमा प्रदेश–२–०३–००१ क १६२१ नम्बरको टिप्परले ठक्कर दिँदा उक्त दुर्घटना भएको हो।
दुर्घटनापश्चात आक्रोशित स्थानीयले उक्त टिप्परमा ढुङ्गामुढा प्रहार गरेर आगजनीको प्रयास समेत गरेका थिए। स्थानीयको ढुङ्गामुढा प्रहार र आगजनीको प्रयासबाट टिप्परमा क्षति पुगेको छ।
ठक्कर दिने टिप्परका चालक फरार रहेको र उनको खोजतलास भइरहेको धनुषाका प्रहरी प्रवक्ता वेदप्रसाद गौतमले जानकारी दिए।
प्रतिक्रिया दिनुहोस !
