प्रदेशको मन्त्रिपरिषदको बैठकबाट गत वर्ष कार्यविधि स्वीकृत गरेसँगै प्रदेशको कृषि तथा पशुपन्छी विकास मन्त्रालयले रकम वितरण गर्न सुरु गरेको हो।
मन्त्रालयमा चालू आर्थिक वर्षमा क्षतिपूर्तिको मागसहित प्रदेशका १३ जिल्लामध्ये ९ वटा जिल्लामा रहेका ४० वटा कृषि फर्मले निवेदन दिएका थिए।
त्यसैअनुसार पहिलो चरणमा प्राकृतिक र गैरप्राकृतिक विपदबाट नोक्सानमा परेका कृषकलाई ५४ लाख ६१ हजार रुपैयाँ क्षतिपूर्ति तथा राहत रकम वितरण गर्न सुरु गरेको हो।
पहिलो चरण अन्तर्गत काभ्रे जिल्लामा रहेको टिम भिजन एग्रिकल्चर फर्म पनौती-५, श्रेष्ठ बंगुर फर्म पनौती-१०, उन्नती हाम्रो बंगर फर्म पनौती-१०, एसएस बंगुर माछा तथा कृषि फर्म बनेपा-७ लाई १०/१० लाख रुपैयाँ राहत रकम वितरण गरेको हो।
यस्तै कृषि तथा पशुपन्छी विकासमन्त्री डा. राजेन्द्रमान श्रेष्ठको अध्यक्षतामा बसेको राहत व्यवस्थापन तथा निर्देशन समितिले नोबेल कृषि फर्म धुलिखेललाई ५ लाख ७० हजार रुपैयाँ, हाम्रो माझीफेदा पशुपालन तथा कृषि फर्म चौरीदेउराली-३, काभ्रेलाई ३६ हजार, दाजुभाइ एकीकृत बहुउद्देश्यीय कृषि फर्म पनौती-९ लाई ३५ हजार, गैरीगाउँ कृषि तथा पशुपन्छी फर्म पनौती-५ लाई ८२ हजार प्रदान गर्ने निर्णय समेत गरेको छ।
कार्यविधि अनुसार कृषकलाई बढीमा १० लाख रुपैयाँ क्षतिपूर्ति दिन मिल्ने व्यवस्था रहको भन्दै अहिले मन्त्रालयले चालु आर्थिक वर्षमा कोषमा रहेको ३ करोड रुपैयाँबाट राहत रकम वितरण कार्य सुरु गरेको मन्त्रालयका प्रवक्ता झलकनाथ कडेँल बताए।
आगामी आर्थिक वर्षका २०८०/०८१ का लागि ५ करोड रुपैयाँ कोषका लागि विनियोजन भएकाले कृषकको फिल्ड ब्याक कस्तो आउछ त्यसैअनुसार अघि बढ्ने उनले बताए।
चालू आर्थिक वर्षको जेठसम्म मकवानपुरबाट ८ वटा निवेदन, चितवनबाट १० वटा,काभ्रेबाट ८ वटा, ललितपुरबाट ६, धादिङबाट, दोलखा, सिन्धुपाल्चोक २/२ वटा र नुवाकोट र सिन्धुली १/१ वटा निवेदन राहत रकम मागसहित निवेदन मन्त्रालयमा दर्ता भएकोमा पहिलो चरणको वितरण गरिएको र अब दोस्रो चरणका लागि पनि चाँडै नै वितरणको तयारी गरिरहेको मन्त्रालयका सचिव डा. शरण पाण्डेले बताए।
प्रतिक्रिया दिनुहोस !
