वीरगन्ज : पर्सामा एक किशोरीलाई फोन गरेर जिस्काएको विषयलाई लिएर भएको कुटपिटमा घाइते भएका युवकको मृत्यु भएको छ।
मृत्यु हुनेमा पर्साको पर्सागढी नगरपालिका-४ बर्वाटोलका २८ वर्षीय जुमदिन अन्सारी रहेका छन्। प्रहरीका अनुसार भारतको केरलामा बस्ने अतुल्लाह अन्सारीकी बहिनीलाई मृतक जुमदिनका भाइले फोन गरेर जिस्क्याएको विषयलाई लिएर गत साउन २० गते राति ९:३० बजेतिर जुमदिन पक्ष र अतुल्लाह पक्षबीच झगडा भएको थियो। झगडाका क्रममै अतुल्लाहसहितका दुई जनाले काठको चिर्पटले प्रहार गर्दा जुमदिन गम्भीर घाइते भएका थिए।
घाइते जुमदिनको बारास्थित एलएस न्युरो अस्पतालमा उपचारका क्रममा बुधबार बिहान ५:१५ बजे मृत्यु भएको प्रहरीले जनाएको छ।
घटनामा संलग्न रहेको आरोपमा प्रहरीले अतुल्लाहसहित दुई जनालाइ पक्राउ गरेको छ। पक्राउ पर्नेमा पर्सागढी नगरपालिका-४ कै २४ वर्षीय अतुल्लाह अन्सारी र ४५ वर्षीय बच्चाबाबु अन्सारी भन्ने वकिल अन्सारी रहेको पर्साका प्रहरी प्रवक्ता प्रहरी नायब उपरीक्षक दीपक गिरीले जानकारी दिए।
प्रतिक्रिया दिनुहोस !
