ताप्लेजुङमा प्रदेश सांसदको घरमा घेरा हालेर प्रहरीले गर्यो हुलहुज्जत
भदौ २२, २०८० शुक्रबार १३:४०:०
विराटनगर : ताप्लेजुङमा कोसी प्रदेशका सांसद (प्रदेशसभा सदस्य) खगेनसिंह हाङ्गामको घरमा घेरा हालेर प्रहरीले बिहीबार राति हुलहुज्जत गरेको छ । पोसाकमा र सादा पोसाकमा लाट्ठी तथा हतियारसहित ठूलो संख्यामा खटिएका प्रहरीले हाङ्गामको फुङ्लिङ नगरपालिका–५ स्थित घरमा घेरा हालेर हुलहुज्जत गरेका हुन् ।
सांसद हाङ्गामको सचिवालयले घटनाको भीडीयो सामाजिक सञ्जाल फेसबुकमा पोस्ट गरेको छ । भीडीयोमा पोसाकसहित लाट्ठी र हतियारधारी तथा बिना पोसाकका प्रहरी अभद्र शैली र उग्ररूपमा प्रस्तुत भएको देखिन्छ ।
प्रहरीले उनको घरको गेटमा पटकपटक लात्ताले प्रहार गरेको भीडीयोमा देख्न सकिन्छ । भीडीयो अहिले भाइरल भइरहेको छ । घटना हुनुको पछाडि दुवै पक्ष उत्तिकै जिम्मेवार रहेको बताइएको छ । जात्रामा प्रहरी र कांग्रेसका कार्यकर्ताबीच विवाद भएको थियो ।
कांग्रेस सांसद हाङ्गाम ताप्लेजुङको निर्वाचन क्षेत्र नम्बर १ (ख) बाट निर्वाचित भएका हुन् । हाङ्गाम तरुण दल ताप्लेजुङको अध्यक्ष, कांग्रेसको क्षेत्रीय सभापति र महाधिवेशन प्रतिनिधि पनि हुन् । घर घेरा हालेर आफूमाथि प्रहरीले आक्रमणको प्रयास गरेको उनले बताए ।
उनका अनुसार घटना राति ११ बजेतिरको हो । ‘ताप्लेजुङस्थित घरमा आएका बेला प्रहरी टोलीले ‘कक’ गरी पेस्तोल तेस्र्याएर आक्रमण गर्न खोज्यो,’हाङ्गामले भने, ‘प्रहरीले हतियार र बर्दीका आडमा गुण्डागर्दी गर्यो ।’ प्रहरीका कारण आफू असुरक्षित हुनु परेको गुनासो उनको छ ।
उनले मदिरा सेवन गरेका प्रहरीले कांग्रेसका कार्यकर्तामाथि कुटपिट गरेको समेत बताए । कांग्रेस कार्यकर्तामाथि कुटपिट भएपछि दिउँसोदेखि नै प्रहरीसँग विवाद र भनाभन भएको हाङ्गामको भनाइ छ । ‘प्रहरीले मापसे (मादक पदार्थ सेवन) गरेर एक जना बहिनीलाई दुःख दिएपछि कांग्रेसका कार्यकर्ताले त्यसो नगर्न आग्रह गरेका हुन् । त्यस क्रममा केही वादविवाद भयो,’ उनले भने, ‘मैले घटना मिलाउन सहजीकरण पनि गरेँ । यही विषयलाई लिएर प्रहरीले घर घेरा हाल्दै मलाई आक्रमणको प्रयास गरे ।’
सुरुमा तरुण दलका कार्यकर्तामाथि प्रहरीले कुटपिट गरेको उनले बताए । काठमाडौंबाट आएका क्षेत्रीय उपसभापति पेमा लामालाई समेत प्रहरीले कुटेको हाङ्गामको भनाइ छ । ‘ताप्लेजुङका प्रहरी प्रमुख डीएसपी राजन लिम्बूले टोली पठाएर घर घेरा हाल्न लगाउँदै हुलहुज्जत र अभद्र व्यवहार गर्न लगाए,’उनले भने, ‘मलाई मार्ने प्रयास गरियो ।’
प्रहरी टोलीमाथि दुव्र्यवहार गरेको भन्दै प्रहरीले एकजनालाई नियन्त्रणमा समेत लिएको छ । प्रहरीले दिलिप लिम्बूलाई पक्राउ गरेको र उनी निर्दोष रहेको हाङ्गामले बताए । प्रहरीले भने रातको समयमा मदिरा सेवन गरेर होहल्ला हुन थालेपछि त्यसो नगर्न आग्रह गर्दा प्रहरीमाथि नै आक्रमणको प्रयास भएको दाबी गरेको छ । राति ९ बजेबाट जात्रा बन्द भएपनि बाटोमा बसेर होहल्ला गर्न थालेपछि सम्झाउन गएको प्रहरीलाई हाङ्गामसहितको टोलीले अभद्र व्यवहार गरेको दाबी प्रहरीको छ ।
कोसी प्रदेश प्रहरीका प्रवक्ता एसपी ऋषिराम कँडेलले घटनाका बारेमा अनुसन्धान भइरहेको जानकारी दिए । ‘प्रदेश माननीय र प्रहरीबीच सामान्य विवाद भएको कुरा आएको छ । यस विषयमा थप बुझ्दै छौं,’ उनले भने ।
प्रतिक्रिया दिनुहोस !
