एमाले उपाध्यक्ष नेम्वाङलाई अध्यक्ष ओलीले दिए अन्तिम श्रद्धाञ्जली

काठमाडौं : नेकपा एमाले अध्यक्ष केपी शर्मा ओलीले संविधानसभा अध्यक्ष एवं पार्टीका उपाध्यक्ष सुवास नेम्वाङप्रति अन्तिम श्रद्धाञ्जली दिएका छन्। अध्यक्ष ओलीलगायत एमालेका नेताहरू ईश्वर पोखरेल, विष्णु पौडेल, प्रदीप ज्ञवाली,योगेश भट्टराई,गोकर्ण विष्टलगायत नेताहरूले नेम्वाङको पार्थिव शरीरमा अन्तिम श्रद्धाञ्जली दिएका हुन्।

अध्यक्ष ओलीले पार्टीको झण्डा ओढाएर नेम्वाङप्रति श्रद्धाञ्जली अर्पण गरेका हुन्।

नेम्वाङको निधनको खबरपछि एमाले महासचिव शंकर पोखरेल चीन भ्रमण छोट्याएर नेपाल फर्किदैछन्। नेम्वाङलाई श्रद्धाञ्जली दिनका लागि एमाले नेता तथा कार्यकर्ता,शुभेच्छुकलगायत पार्टी केन्द्रीय कार्यालयमा बाक्लो उपस्थित रहेको छ।

नेम्वाङलाई नेकपा समाजवादीका सम्मानित नेता झलनाथ खनाल,उपसभामुख इन्दिरा राना मगरलगायतले श्रद्धाञ्जली दिएका छन्।

नेम्वाङको पार्थिव शरीर आज दिनभर एमाले पार्टी कार्यालयमा राखिने पार्टी कार्यालयले जनाएको छ।  सामान्य रुघाखोकी लागेर घरमा आराम गरिरहेका नेम्वाङलाई मंगलबार राति हृदयघात भएपछि उपचारका लागि राति १:३० बजे त्रिवि शिक्षण अस्पताल लगिएकोमा उपचारको क्रममा त्यहीँ निधन भएको हो।

सरकारले नेम्वाङको राजकीय सम्मानका साथ अन्त्येष्टि गर्ने निर्णय गरेको छ।