जोमसोम : मुस्ताङमा धमाधम स्याउ संकलन गर्न थालिएको छ । यसअघि जिल्लामा असोज अगावै स्याउ टिप्न नपाइने नियम लागु गरिएपनि तीज पर्वलाई लक्षित गरी मुस्ताङको स्याउ बगैँचामा पुगेर व्यापारीहरुले धमाधम संकलन गर्न थालेका हुन् ।
असोज १ गते हरितालिका तीज पर्व पर्ने भएको र पर्वमा स्याउको माग बढी हुने भएकाले जिल्लाको स्याउ टिप्ने निर्णयको बेवास्ता गर्दै व्यापारीले स्याउ संकलन गरेर बजार पुर्याउने चटारो चलेको हो । चाडपर्वमा कृषकले लगाएको स्याउको सुहाउँदो मुल्य पाउने भएपछि स्याउ टिप्न पाउने टाईमकार्डको अवज्ञा गर्दै मुस्ताङको स्याउ व्यापारीले धमाधम बजार पुर्याउने थालेको मार्फास्थित नेबिरा कृषि फार्मका प्रतिनिधि दिपक लालचनले जानकारी दिए । उनले मुस्ताङको थासाङ र घरपझोङ गाउँपालिका क्षेत्रमा उत्पादित उच्च नत्व प्रविधिमा आधारित स्याउ टिप्ने चटारो चलेको बताए ।
फार्मका प्रतिनिधि लालचनले गत वर्ष १७०रुपैयाँ प्रति केजीमा बिक्री गरिएको स्याउ यसवर्ष १८० रुपैयाँ प्रति केजीमा बिक्री गरेको बताए । असोज अगावै स्याउ टिप्न नपाईने जिल्लाको नियमको खण्डन गर्दै कृषक लालचनले जिल्लाले गरेको स्याउ टिप्न नपाईने नियम अवैज्ञानिक र अपरिपक्क भएको टिप्पणी गरे ।
कृषि ज्ञान केन्द्र मुस्ताङका कार्यालय प्रमुख प्रकाश बस्ताकोटीले उच्चघनत्व प्रविधिको ईटालियन स्याउ भदौ १५ गते अगावै पाकिसक्ने बताए। उनले उच्चघनत्वको गाला ,फुजी,गोल्डेन र किङरोट स्याउमा असोज अगावै रस भरिलो हुने जानकारी दिए । तर, स्याउ उत्पादन र गुणस्तर कायम गर्न स्थानीय उन्नत जातका स्याउलाई भने असोजपछि मात्र टिप्दा उपयुक्त हुने केन्द्र प्रमुख बस्ताकोटीले सुझाए ।
यसअघि मुस्ताङको घरपझोङ गाउँपालिकाले असोज अगावै स्याउ टिप्न नपाईने नियमलाई कार्यान्वयन गर्न जोमसोम र मार्फा बजारक्षेत्रमा अनुगमन गरेको थियो । अनुगमनमा गाउँपालिकाले स्थानीय फुटकर व्यापारीले बिक्रीमा बेच्न राखेका २५ केजी स्याउ बरामत गरेको थियो ।
जिल्ला समन्य समिति मुस्ताङको पहलमा जिल्लाका ५ स्थानीय तहलाई समन्वय गरी असोज अगावै स्याउ संकलन गर्न नपाइने निर्णय गरेको थियो । पर्वलाई लक्षित गरी धादिङ,पोखरा,म्याग्दी,बाग्लुङ र मुस्ताङका स्थानीय व्यापारीहरु धमाधम स्याउ संकलन गर्न थालेका हुन् ।
प्रतिक्रिया दिनुहोस !
