जोमसोम : सन् २०२२ को तुलनामा सन् २०२३ को ९ महिना अवधिमा मुस्ताङ घुम्ने विदेशी पर्यटक बढेका छन् । सन् २०२३ को जनवरीदेखि सेप्टेम्बर २८ तारिखसम्म कूल ५६ हजार ८८ जना विदेशी पर्यटकले मुस्ताङको भ्रमण गरेको अन्नपूर्ण संरक्षणक्षेत्र आयोजना ईलाका संरक्षण कार्यालय जोमसोम (एक्याप) चेक पोस्टले जनाएको छ ।
एक्याप चेक पोस्ट अनुसार मुस्ताङको थासाङ गाउँपालिकाको घाँसा चेक पोस्टमा प्रवेश भएको विदेशी पर्यटकको तथ्याङकमा यो संख्या केही बढी हुनसक्ने अनुमान गरिएको छ ।
सन् २०२३ को जनवरीदेखि सेप्टेम्बर २८ तारिखसम्ममा सार्क देशका ५१ हजार ५६४ र ४ हजार ५२४ जना विदेशी पर्यटक मुस्ताङ भित्रिएको एक्याप जोमसोमका कार्यालय प्रमुख प्रदिपराज रग्मीले जानकारी दिए ।
सन् २०२२ को १२ महिनामा कुल ५२ हजार ३९८ जना विदेशी पर्यटक मुस्ताङ भित्रिएका थिए । जसमध्ये सार्क देशका ४६ हजार ७१० जना र विदेशी पर्यटक ५ हजार ६८८ जना मुस्ताङ भित्रिएका थिए । सन् २०२२ को जनवरी देखि सेप्टेम्बरसम्म तथ्यांकमा ४१ हजार ८३१ जना विदेशी मुस्ताङ भित्रिएकोमा सन् २०२३ को जनवरीदेखि सेप्टेम्बरसम्मको तथ्यांकमा ५६ हजार ८८ विदेशी पर्यटक मुस्ताङ भित्रिएका हुन् ।
सन् २०२२ को कुल पर्यटकमध्ये सन् २०२३ को जनवरीदेखि सेप्टेम्बरसम्मको पर्यटकीय तथ्यांकमा १४ हजार २५७ जना अर्थात २५ दशमलव ४१ प्रतिशत विदेशी पर्यटक वृद्धि भएको एक्याप जोमसोमको भनाई छ । सन् २०२२ मा कुल मध्ये सन् २०२३ को ९ महिना अवधिमै ३ हजार ६९० जना अर्थात ६ दशमलव ५७ प्रतिशत पर्यटक वृद्धि भएको हो ।
मुस्ताङमा सार्क तथा फरेनर विदेशी पर्यटकको संख्या बढेपनि आन्तरिक पर्यटकको सख्या घटेका छन् । आर्थिक मन्दी तथा सडक असजहता कारण आन्तरिक पर्यटक घटेको हो । जामसोम स्थित होटल ट्रेकर्स ईनका संञ्चालन सकबहादर लालचनले मुस्ताङमा विदेशी पर्यटक भित्रिने क्रम बढ्दो रहेपनि आन्तरिक पर्यटक विगतको तुलनामा कम भएको बताए ।
बर्खायामको मौसममा बेनी—जोमसोम सडकमा बाढी पहिरो र नदी कटानले सडक अवरुद्ध हुँदा मुस्ताङमा आन्तरिक पर्यटक भित्रिन सकेका थिएनन् । सोह्र श्राद्ध सुरु भएसँगै आन्तरिक पर्यटक मुक्तिनाथ दर्शन गर्न आउने थालेको मुक्तिनाथ विकास समितिका कर्मचारी रविन सुवेदीले जानकारी दिए । उनका अनुसार सोह्र श्राद्ध सुरु हुनु अघि मुक्तिनाथमा ९० प्रतिशत भारतीय र १० प्रतिशत आन्तरिक तिर्थालु मुक्तिनाथ दर्शन गर्न आउने गरेकोमा अहिले भारतीय र आन्तरिक तिर्थालुको संख्या बराबरी हुन पुगेको छ ।मुस्ताङमा बर्सेनि ७० हजार विदेशी र ५ लाख आन्तरिक पर्यटकले भ्रमण गर्ने गरेका थिए ।
प्रतिक्रिया दिनुहोस !
