सुदूरपश्चिममा एमालेको सर्वसम्मत नेतृत्व चयन,अध्यक्षमा कृष्णप्रसाद जैशी
असोज २५, २०८० बिहीबार ११:३९:२२
धनगढी : नेकपा एमाले सुदूरपश्चिमको नेतृत्व सर्वसम्मत रुपमा चयन भएको छ । अध्यक्ष पदमा अछामका कृष्णप्रसाद जैशी सर्वसम्मत निर्वाचित भएका छन् । अध्यक्षमा जैसीसहित अछामकै कमल तिमिल्सिना, अछामकै भरतबहादुर साउद र कञ्चनपुरका बच्चनबहादुर सिंहले उमेदवारी दर्ता गराएका थिए । पाँच दिनको सर्वसम्मतको प्रयास पछि बिहीबार बिहान मात्रै तीनैजनाले उमेदवारी फिर्ता लिएपछि जैशी अध्यक्षमा सर्वसम्मत भएका हुन् ।
यस्तै उपाध्यक्षमा बाजुराका कालीबहादुर शाही सर्वसम्मत चयन भएका छन् । उपाध्यक्षमा उमेदवारी दर्ता गराएका बाजुराका बलदेव रेग्मी, कैलालीका हरिसिंह साउद, कञ्चनपुरका रणबहादुर महरा र डडेल्धुराका गजेन्द्रबहादुर शाहीले उमेदवारी फिर्ता लिएपछि शाही सर्वसम्मत भएका हुन् ।
सचिवमा कैलालीका रणबहादुर चन्द सर्वसम्मत निर्वाचित भएका छन् । सचिवका लागि कैलालीकै जीवनकुमार बम, राजेश खाती र रतनराज रेग्मीले पनि उमदेवारी दर्ता गराएका थिए । तीनैजनाले उमेदवारी फिर्ता लिएका छन् । उपसचिव (महिला) मा कैलालीकी भागरथी विष्ट चयन भएकी छन् ।
उपसचिव (महिला) मा कैलालीकै कन्दकला राना र डोटीकी अर्चना गहतराजले उमेदवारी दिएका थिए । दुबैजनाले फिर्ता लिएपछि विष्ट उपसचिव (महिला) मा निर्वाचित भएकी हुन् । उपसचिव खुल्लामा कञ्चनपुरका नरबहादुर विश्वकर्मा सर्वसम्र्मत भएका छन् ।
उप सचिव (खल्ला) मा अशोक कुमार चन्द, रामदत्त जोशी, हरदेव जोशी, सुरेन्द्रबहादुर पाल र आनन्दलाल विश्वकर्माको उमेदवारी परेको थियो । निर्वाचन आयोगले ५ जनाले नै उमेदवारी फिर्ता लिएपछि नरबहादुर विक सर्वसम्मत चयन भएका हुन् ।
जिल्लागतरुपमा छुयाइएको सदस्यमा भने निर्वाचनको सम्भावना बढेर गएको छ । कैलाली, कञ्चनपुर, बैतडी, बझाङ र अछाम जिल्लाका लागि छुट्यएएको कोटामा सदस्य पदमा भने सर्वसम्मत हुन सकेको छैन । यी जिल्लाका लागि मतदानको तयारी भइरहेको निर्वाचन आयोगका सदस्य राजेन्द्र ठगुन्नाले जानकारी दिए ।
अधिवेशनमा प्रदेश कमिटीको नेतृत्व चयनका लागि नौवटै जिल्लाबाट गरी ६ सय ७५ जना प्रतिनिधि छनोट भएर पाँच दिनदेखि धनगढीमै बसेका छन् ।
प्रतिक्रिया दिनुहोस !
