संघीयता कार्यान्वयनकै चरणमा रहेकाले आत्तिनु पर्दैन : मुख्यमन्त्री जम्कट्टेल

हेटौंडा : बागमती प्रदेशका मुख्यमन्त्री शालिकराम जम्कट्टेलले संघीयता कार्यान्वयनकै चरणमा रहेकाले संघीय अभ्यासमा आत्तिनुहाल्नुपर्ने स्थिति नरहेको बताएका छन् । बिहीबार हेटौंडामा तहगत अधिकारको कार्य विस्तृतीकरण विषयक अन्तरक्रिया कार्यक्रमलाई सम्बोधन गर्दै मुख्यमन्त्री जम्कट्टेलले नेपालमा सङ्घीयता कार्यान्वयनका लागि एकल र साझा अधिकारका विषयमा  तिनै तहका सरकार सकारात्मक रहेकाले आत्तिहाल्नुपर्ने स्थिति नरहेको बताएका हुन् ।   

संघीयता लागू भएका अन्य मुलुकमा अधिकार प्राप्तिका लागि विभिन्न चरणहरू पार गर्नु परेको बताउँदै हाम्रो देशको सन्दर्भमा सकारात्मक रहेको उनको भनाइ छ । अहिले देखिएको विकास,समृद्धि सामाजिक चेतना लामो समयपछिको राजनीतिक आन्दोलन र बलिदानबाट प्राप्त भएको भन्दै यो व्यवस्थाको विकल्प समेत नरहेको उनले बताए । 

'एकल र साझा अधिकार प्राप्त नभएर कामनै गर्न कठिन भएको भन्ने होइन । केही तहगत अधिकारहरु आउन सकेको छैन । छिट्टै नै संस्थागत रूपमा आउँछ,'उनले भने,'अधिकार प्रत्यायोजन गर्न नै प्रधानमन्त्रीले समिति गठन गरेर परिमार्जन गर्ने भन्ने निर्णय गरेका छन् । प्रक्रियागत रूपमा अधिकार प्राप्त हुन्छ । '

नकारात्मक भन्दा पनि सबै सकारात्मक भएर अघि बढ्नु पर्ने उनले बताए  । दुई दिनसम्म हुने कार्यक्रममा ७ वटै प्रदेशका मुख्यमन्त्रीहरुको सहभागीता रहने बताइएको छ भने  कार्यक्रममा सबै प्रदेशका मुख्यसचिव विज्ञ टोलीलगायतको सहभागिता रहेको छ ।