परासी : नवलपरासीका विभिन्न स्थानमा अहिले भुस्याहा कुकुरको बिगबिगी बढेको छ । यसको नियन्त्रणका लागि सम्बन्धित पालिकाहरुले वास्ता नगर्दा सर्वसाधारणहरु त्रासमा हिँडनु परेको छ । हरेक दिनजसो भुस्याहा कुकुरले टोकेका सर्वसाधारणहरुको संख्या बढ्दै गएको छ ।
पृथ्वीचन्द्र जिल्ला अस्पतालमा मात्र दैनिक १५ देखि १६ जना कुकुरले टोकेका सर्वसाधारणहरु आउने गरेको अस्पतालका निमित्त मेडिकल सुपरिटेन्डेन्ट डा. किरण पाण्डेले जानकारी दिए । कुकुरले टोकेका सर्वसाधारणको संख्या बढेपछि अस्पतालमा रेबिजविरुद्धको औषधि अभाव समेत भएको थियो ।
निःशुल्क औषधि नभएपछि सर्वसाधारणले महंगोमा औषधि किनेर लगाउँदै आएका थिए । दुई दिनअघि प्रदेश सरकारले पठाएको औषधि आएकाले अहिले निःशुल्क उपलब्ध गराइँदै आइएको डा. पाण्डेले बताए । ‘अहिले एक सय एम्पुल आएको छ । कुकुरले टोकेका सर्वसाधारणहरु बढेकाले यो औषधि केही दिनलाई मात्र पुग्छ,'उनले भने ।
भुस्याहा कुकुरको बिगबिगी बढेपनि नियन्त्रणमा समस्या भएको रामग्राम नगरपालिकाका कार्यबाहक नगर प्रमुख सम्झना चौधरीले बताइन् । पछिल्लो पटक धेरै जनालाई भुस्याहा कुकुरले टोकेको जानकारी पाएको बताउँदै नियन्त्रणका लागि प्रयास गरिने उनको भनाइ छ ।
‘पहिला भुस्याहा कुकुरलाई मारेर नियन्त्रण गरिन्थ्यो, अहिले मार्न पाइदैन त्यसले गर्दा पनि भुस्याहा कुकुरको संख्या बढेको छ । कसरी व्यवस्थापन गर्ने भन्ने बारे छलफल गरेर अगाडी बढ्छौं,'कार्यबाहक नगर प्रमुख चौधरीले भनिन् ।
प्रतिक्रिया दिनुहोस !
