मुख्यमन्त्री कार्कीको ठाउँ-ठाउँमा जग्गा जमिन, कोशीका मन्त्रीहरूको कति छन् सम्पत्ति?

विराटनगर : कोशी प्रदेशका मुख्यमन्त्री र मन्त्रीहरूले बुधबार आफ्नो सम्पत्ति विवरण सार्वजनिक गरेका छन्।

 
मुख्यमन्त्री केदार कार्कीसहित मन्त्रीहरू शम्शेर राई, गणेशप्रसाद उप्रेती र कमलप्रसाद जबेगूले सम्पत्ति विवरण सार्वजनिक गरेका हुन्। मोरङको बूढीगंगा गाउँपालिका-२ स्थायी ठेगाना भएका मुख्यमन्त्री कार्कीको विराटनगर महानगरपालिका र बूढीगंगाका ठाउँठाउँमा जग्गा जमिन छन्। उनले घर र सबै जग्गा श्रीमती शान्तादेवी बस्नेतको नाममा राखेका छन्। 

कार्कीले पत्नी शान्तदेवीको नाममा बूढीगंगामा १ कट्ठा साढे १२ धुर जग्गा र त्यही जग्गामा घर रहेको विवरण सार्वजनिक गरेका छन्। कार्कीले उक्त घरजग्गा पैत्रिक सम्पत्ति बेचबिखन तथा जागिरबाट आर्जन गरेको उल्लेख गरेका छन्।
 
त्योबाहेक बूढीगंगामा मात्रै ४ कट्ठा जग्गा छ। बूढीगंगा-२ ‘क’मा पौने ९ धुर, बूढीगंगा-२ ‘क’मै सवा ११ धुर र बूढीगंगा-८ ‘ख’मा ३ कट्ठा जग्गा रहेको सम्पत्ति विवरणमा खुलाइएको छ। मुख्यमन्त्री कार्कीले बूढीगंगाको जग्गा जागिर, बोनस, कर्जा र सापटीबाट जोडेको उल्लेख गरेका छन्। उनले पौने ९ धुर र सवा ११ धुर जग्गाको ३-३ लाख तथा ३ कट्ठाको १२ लाख रूपैयाँ भनेर खरिद मूल्य खुलाएका छन्।

 
उनकी पत्नीको नाममा विराटनगरभित्र मात्रै विभिन्न ४ ठाउँमा गरेर १ बिघा ६ कट्ठा सवा १० धुर जग्गा छ। सबै जग्गा विराटनगर-७ मा पर्छ। विराटनगरभित्र कित्ता नम्बर ४० को २ सय ५० बर्गमिटर, कित्ता नम्बर ३० को ८ सय ८६ दशमलव २५ र कित्ता नम्बर २४ को ४ सय २६ दशमलव २५ बर्गमिटर तथा कित्ता नम्बर उल्लेख नगरिएको १ बिघा २ कट्ठा सवा २ धुर जग्गा छ।
 
विराटनगरको सबै जग्गा विभिन्न ठाउँको जमिन बिक्रीबाट खरिद गरेको कार्कीले खुलाएका छन्। उनले कित्ता नम्बर ४० को २ लाख ५० हजार, ३० को १० लाख ६२ हजार ५ सय र कित्ता नम्बर २४ को ४ लाख २६ हजार २ सय ५० रूपैयाँ खरिद मूल्य रहेको खुलाएका छन्। त्यस्तै, कित्ता नखुलाइएको १ बिघा २ कट्ठा सवा २ धुर जग्गा १ करोड २१ लाख ६१ हजार ८ सय ७५ रूपैयाँमा खरिद गरिएको कार्कीको सम्पत्ति विवरणमा उल्लेख छ। सबै जग्गाको खरिद मूल्य १ करोड ५६ लाख ९९ हजार बराबर हुन्छ। 

कार्कीको परिवारसँग विवाह, उपहार तथा खरिदबाट प्राप्त भएको २५ तोला सुन र ८० तोला चाँदी रहेको उल्लेख छ। मुख्यमन्त्री कार्की र परिवारका सदस्यको नाममा विभिन्न बैंकमा लगभग ८ लाख नगद रहेको देखिन्छ। उनको नाममा कृषि विकास बैंकमा २० हजार ८३ रूपैयाँ ९० पैसा, उनकी श्रीमती शान्तादेवीको नाममा कृषि विकास बैंकमा ८२ हजार ५ सय ७८ रूपैयाँ ४४ पैसा र एभरेष्ट बैंकमा ३ हजार ६ सय ६० तथा छोराहरु साकेतबाबुको नाममा कृषि विकास बैंकमा ३ लाख ४८ हजार ५ सय ८४ र शाब्दिकबाबुको नाममा ३ लाख ३९ हजार ८ सय ३६ रूपैयाँ ६९ पैसा रहेको सम्पत्ति विवरण सार्वजनिक गरिएको छ। सबै नगद तलब, भत्ता, बचत र ब्याजबाट प्राप्त भएको खुलाइएको छ।
 
विभिन्न ५२ वटा बैंक तथा वित्तीय संस्था तथा कम्पनीको शेयर मुख्यमन्त्री कार्की, उनकी श्रीमती र छोराहरुको नाममा १ लाख ८७ हजार बराबरको रहेको छ। कृषि विकास बैंकको हालको मूल्य ५ लाख ६३ हजार ४ सय ५६ बराबरको २ हजार २ सय ७२ कित्ता शेयर छ। १ करोड ८ लाख २ हजार ऋणमध्ये कार्कीले ८ लाख ७० हजार मात्रै तिरेको उल्लेख गरेका छन्। सवारीसाधनमा श्रीमती शान्तादेवीको नाममा ३ लाख १८ हजारको एक थान स्कुटर मात्रै खुलाइएको छ।

 
त्यस्तै, सरकारका प्रवक्ता एवं आन्तरिक मामिला तथा कानुनमन्त्री शम्शेर राईले इलामको रोङ गाउँपालिका-४ र ६ को ५ ठाउँमा जग्गा रहेको खुलाएका छन्। १० तोला सुन र बैंक मौज्दात ६२ हजार र सहारा नेपाल बचत तथा ऋण सहकारी संस्थामा आफ्नो परिवारको सदस्य मालती राईको नाममा १ लाख ५० हजार रुपैयाँ बराबरको शेयर पूँजी रहेको राईले उल्लेख गरेका छन्। उनको यावा अलैंची खेती तथा नर्सरी र यावा बाख्रा फर्म २०७० सालमा दर्ता गरी सञ्चालनमा छ।
 
यसैबीच, भौतिक पूर्वाधार विकासमन्त्री कमलप्रसाद जबेगूले पाँचथरको फालेलुङ-१, फालुलुङ-२ र झापाको मेचीनगर नगरपालिका-५ मा ६ कित्ता जग्गा रहेको खुलाएका छन्। सुनचाँदीमा ११ तोला सुन र १५ तोला चाँदी रहेको उनले उल्लेख गरेका छन्। उनको १ लाख रुपैयाँ बैंक मौज्दात रहेको र अरुण काबेली हाइड्रो पावर लिमिटेडमा ५० कित्ता शेयर रहेको खुलाएका छन्। जबेगुले हातेमालो सहकारीबाट ४ लाख ऋण लिएको र आफ्नो साथमा १ वटा दुहुना गाई, १ हल गोरु र १ वटा खसी १ रहेको सम्पत्ति विवरण सार्वजनिक गरेका छन्।
  
त्यस्तै, वन, पर्यटन तथा वातावरणमन्त्री गणेश उप्रेतीले श्रीमती नरमाया भट्टराईको नाममा विराटनगरमा १ कट्ठा ५ धुर र सुनसरीको इटहरीमा ११ धुर जग्गा रहेको उल्लेख गरेका छन्। उनको परिवारसँग १० तोला सुन र २० तोला चाँदी तथा विभिन्न बैंकमा परिवारको नाममा २ लाख ७८ हजार रुपैयाँ नगद रहेको उल्लेख छ। 
 
उप्रेतीको परिवारको नाममा विभिन्न वित्तीय संस्थामा १ हजार ४ सय ५० कित्ता शेयर रहेको सम्पत्ति विवरणमा खुलाइएको छ। उनले विभिन्न बैंक तथा वित्तीय संस्थामा ३९ लाख ५० हजार ऋण तिर्न बाँकी रहेको देखाएका छन्। उनको एउटा होण्डा मोटरसाइकल र सुजुकी ब्राण्डको स्कुटर रहेको विवरणमा उल्लेख गरेका छन्। उनले सामूहिकरूपमा कृषि फारम तथा गाई फारम सञ्चालन गरिरहेको खुलाएका छन्।