देउवाले भने- महासमिति बैठकमा जेजस्तो भएपनि वर्तमान गठबन्धन तलमाथि हुँदैन

काठमाडौं : प्रधानमन्त्री पुष्पकमल दाहाल 'प्रचण्ड' र नेपाली कांग्रेसका सभापति शेरबहादुर देउवाबीच भेटवार्ता भएको छ । प्रधानमन्त्री दाहाललाई भेटन सभापति देउवा शुक्रबार बिहान प्रधानमन्त्री निवास बालुवाटार गएका थिए । कांग्रेस महासमिति बैठक सकिएलगत्तै सभापति देउवा प्रधानमन्त्री दाहाललाई भेटन गएका हुन् । सभापति देउवाले महासमिति बैठकमा छलफल भएका विषय र निष्कर्ष प्रधानमन्त्री दाहाललाई सुनाएका थिए ।

प्रधानमन्त्री दाहाल र सभापति देउवाबीच आसन्न राष्ट्रिय सभा अध्यक्षको निर्वाचन, वर्तमान सत्ता गठबन्धन,  महासमिति बैठकलगायत विषयमा छलफल भएको थियो । छलफलमा कांग्रसका प्रमुख सचेतक रमेश लेखक,उपप्रधानमन्त्री पूर्णबहादुर खडका,नेता कृष्णप्रसाद सिटौला उपस्थित थिए ।

महासमिति बैठकमा नेकपा माओवादी केन्द्रसँग गठबन्धन गरेर कांग्रेसले गल्ती गरेको र अबका निर्वाचनमा कांग्रेस एक्लै लड्ने विषयमा अधिकांशले आवाज उठाएका थिए । महासमिति बैठकमा  जेजस्ता विषयमाथि छलफल भएपनि वर्तमान गठबन्धन तलमाथि नहुने सन्देश सभापति देउवाले प्रधानमन्त्री दाहाललाई दिएको बालुवाटार स्रोतले बताएको छ । 

भेटमा कांग्रेसका नेताहरूले वर्तमान गठबन्धनको विकल्प नखोजिने र अहिलेकै गठबन्धनलाई बलियो बनाएर लैजान कांग्रेस तयार रहेको प्रचण्डलाई सुनाएका थिए । महासमिति बैठकमा वर्तमान सत्ता गठबन्धनको विषयमा भएको छलफलप्रति माओवादी नेतृत्व कांग्रेससँग सशंकित बनेको छ  । 

एमाले अध्यक्ष ओली र प्रधानमन्त्री दाहालको बाक्लिएको पछिल्लो सम्बन्धलाई लिएर कांग्रेस समेत माओवादी केन्द्रसँग सशंकित बनेको छ।  राष्ट्रियसभा निर्वाचनमा कोशीमा आएको परिणामबाट माओवादी केन्द्र कांग्रेससँग थप चिढिएको छ ।