गुलरिया : नेपाल कम्युनिष्ट पार्टी एमाले जिल्ला कमिटी बर्दियाको अध्यक्षमा शालिकराम अधिकारी निर्वाचित भएका छन्। लाल बहादुर श्रेष्ठलाई १० मतले उछिन्दै अधिकारी विजयी भएका छन्।
अधिकारीले १ सय ८० मत प्राप्त गर्दा श्रेष्ठले १ सय ७० मत ल्याएका हुन्। नेकपा एमाले बर्दियाको १० औं अधिवेशनले कार्यसमिति सर्वसम्मत रुपमा चयन गर्न नसकेपछि निर्वाचन प्रक्रियामा गएको थियो। दुई वटा प्यानलमा निर्वाचनमा सहभागी थिए। उपाध्यक्ष पदका विजयी दुर्गाबहादुर वली १ सय ७९ मत प्राप्त गर्दा प्रतिद्वन्द्वी कृष्णप्रसाद गौतमले १ सय ५९ मत प्राप्त गरेका छन्।
सचिव पदमा पदम ढकालले १ सय ७९ मत प्राप्त गरे प्रतिद्वन्द्वी नैन बहादुर खत्रीले १ सय ६८ मत प्राप्त गरी पराजित भए। उपसचिव खुलातर्फ लहानु थारूले १ सय ७८ मत प्राप्त गरी विजयी भएका छन्। प्रतिद्वन्द्वी जीवन शाहीले १ सय ५८ मत प्राप्त गरे। उपसचिव महिलातर्फ संगीता थारूले १ सय ८७ मत प्राप्त गरी विजयी भएकी छिन्। त्यस्तै प्रतिद्वन्द्वी मन्जु शर्माले १ सय ५१ मत प्राप्त गरिन्।
कुल ३ सय ६४ प्रतिनिधि मतदाता रहेको अधिवेशनमा ३ सय ५९ मत खसेको थियो। अधिवेशनबाट ५ जना पदाधिकारीसहित १ सय ५ सदस्यीय जिल्ला कमिटी गठन भएको छ। अधिवेशनले विष्णु भट्टराईको अध्यक्षतामा ७ सदस्यीय लेखा समिति सर्वसम्मत चयन गरेको निर्वाचन समितिले जनाएको छ। बुधबार नेकपा एमालेका महासचिव शंकर पोखरेलले उद्घाटन गरेको अधिवेशन बिहीबार सकिएको छ।
प्रतिक्रिया दिनुहोस !
