जोमसोम : चीनको कोरला नाकासँग सिमाना जोडिएको कोरला नाका जोड्ने सडकमा कालोपत्रे गरिने भएको छ।
राष्ट्रिय गौरवको कालिगण्डकी करिडोर (बेनी-जोमसोम-कोरला) सडक आयोजनाले पहिलो चरणमा मुस्ताङको वारागुङ मुक्तिक्षेत्रदेखि लोघेकर दामोदरकुण्ड गाउँपालिका घमीसम्मको ५० किमी दुरीको ग्राभेल सडकमा कालोपत्रे गर्न लागिएको हो।
राष्ट्रिय गौरवका जोमसोम-कोरला ११० किमी ग्राभेल सडकमध्ये पहिलो चरणमा (कागबेनी-घमी)ग्राभेल सडकलाई कालोपत्रे गर्ने गरी योजना अघि बढाइएको आयोजनाले जनाएको छ।
भारतीय नाकाबन्दीपछि २०७३/०७४ सालमा ठेक्का सम्झौता सुरु भई सडक स्तरोन्नति कार्य सुरु गरिएको बेनी-जोमसोम-कोरला सडकको हालसम्मको भौतिक प्रगति ८२ प्रतिशत छ। जसमध्ये ५० किमी सडकमा कालोपत्रे सडक समेत विस्तार भइसकेको छ।
बेनी-जोमसोम ७४ किमी ४ खण्डको सुरुवाती चरणमा ठेक्का भई सडक स्तरोन्नतिको काम भइरहेकोमा जोमसोम-कोरला सडकमा कालोपत्रे नभई ग्राभेल सडकको योजना परेको थियो। जोमसोम-कोरला ७ खण्ड मध्ये ६ खण्डको ग्राभेल सडकको निर्माण कार्य सम्पन्न भइसकेको छ । चराङ-छोसेर २५ किमी सडक पनि अन्तिम चरणमा छ ।
जोमसोम-कोरला ७ खण्डमध्ये २ वर्षअघि जोमसोम-कोरलाको पहिलो फेज जोमसोम -कागबेनी १३ खण्डमा कालोपत्रे सडकको ठेक्का सम्झौता भएको थियो । अहिले त्यहाँ कालोपत्रे सडकको काम भइरहेको छ । योसँगै चालु आर्थिक वर्षमा कोरला नाकासम्म कालोपत्रे विस्तार गर्ने लक्ष्यसहित भौतिक पूर्वाधार मन्त्रालय अन्तर्गत (बेनी-जोमसोम-कोरला)सडक आयोजनाले आगामी आर्थिक वर्षमा कागबेनी-घमी कालोपत्रे गर्ने तयारी अघि बढाएको आयोजना प्रमुख ध्रुव झाले जानकारी दिए ।
प्रतिक्रिया दिनुहोस !
