नुवाकोट : नुवाकोटको कोलोनीमा रहेको त्रिशूली अस्पतालले आधुनिक ‘सिटी स्क्यान’ सेवा सञ्चालन गरेको छ। बागमती प्रदेश सरकारको आर्थिक सहयोगमा सिटी स्क्यान मेशिन उपकरण जडान गरिएको हो। विदुर नगरपालिका-९ कोलोनीस्थित’सरकारी अस्पतालमा सिटी स्क्यान सेवा सञ्चालनमा ल्याउँदा बिरामीलाई सहुलियत शुल्कमा परीक्षण गराउने सुविधा प्राप्त भएको‘ त्रिशूली अस्पतालका निर्देशक डा राजेन्द्र लामाले जानकारी दिए।
उनका अनुसार बिरामीको रोग पत्ता लगाउन सहज भएसँगै अस्पतालले प्रवाह गर्ने सेवा र अस्पतालप्रतिको विश्वास समेत बढाउन उल्लेख्य सहयोग पुगेको छ। ८ करोड रुपैयाँको लागतमा सिटिस्कान मेशिन जडान गरिएसँगै बिरामीलाई काठमाडौँ जानुपर्ने बाध्यता अन्त्य भएको छ।
मानव शरीरको भित्री अङ्गका रोग तथा चोटपटक जानकारी लिन अति नै महत्वपूर्ण रहेको सिटी स्क्यान उपकरणले मस्तिष्क, टाउको, घाँटी, छाती, पेट, आन्द्रा, कलेजो, फोक्सो, नशालगायत शरीरको भित्र अङ्गका रोगको पहिचानका लागि प्रभावकारी मानिने गरिएको छ। यस उपकरणका सहायताले सघन प्रकृतिका रोगको समस्या पहिचान गरेर त्यसको समयमै निदानका लागि प्रभावकारी मानिने निर्देशक डा. लामाको भनाइ छ।
अस्पतालले सिटी स्क्यान सेवा उपभोगका लागि रोगका प्रकृति र जाँच गर्नुपर्ने अवस्था हेरेर तीन हजारदेखि आठ हजारसम्म शुल्क निर्धारण गरेको छ। उक्त शुल्कमा स्वास्थ्य बिमा गरेका बिरामीले १० प्रतिशत मात्रै नगद भुक्तानी गरे पुग्ने भएकाले बिरामीले एक हजारभन्दा कम शुल्कमा नै सिटी स्क्यानको सबै सुविधा उपभोग गर्न पाउनेछन्।
प्रतिक्रिया दिनुहोस !
