परिवर्तनका आन्दोलनमा आदिवासी जनजातिको योगदान महत्वपूर्ण : मुख्यमन्त्री कार्की

विराटनगर : कोशी प्रदेशका मुख्यमन्त्री हिक्मतकुमार कार्कीले मुलुकमा परिवर्तनका लागि भएका विभिन्न आन्दोलनमा आदिवासी जनजातिको महत्वपूर्ण योगदान रहेको उल्लेख गरेका छन् । ३० औं विश्व आदिवासी दिवसको अवसरमा शुक्रबार शुभकामना व्यक्त गर्दै उनले परिवर्तनका लागि आदिवासी जनजातिले दिएको योगदान प्रशंसनीय रहेको बताएका हुन् ।

प्रदेशका आदिवासी जनजातिहरूको भाषा, संस्कृति, संस्कार र परम्परालाई संरक्षण र विकास गर्न प्रदेश सरकार प्रतिबद्ध रहेको कार्कीले बताएका छन् । आदिवासी जनजातिको पहिचानलाई थप परिस्कृत बनाउन आफू लागिपरेको उनले बताए । 

स्वदेश तथा विदेशमा रहेका आदिवासी जनजाति समुदायसहित सम्पूर्ण नेपालीहरूमा शुभकामना व्यक्त गर्दै मुख्यमन्त्री कार्कीले भने,‘प्रथम सहिद लखन थापादेखि अहिलेसम्म भएका परिवर्तनका आन्दोलनमा आदिवासी जनजातिको योगदान स्मरणीय छ ।’ 

आदिवासी जनजाति दिवसले संघीय लोकतान्त्रिक गणतन्त्रको कार्यान्वयन र सुदृढीकरण तथा अधिकार प्राप्तिको अभियानमा निरन्तर सफलता मिल्ने विश्वास लिएको मुख्यमन्त्री कार्कीद्धारा जारी शुभकामना सन्देशमा उल्लेख  छ । 

‘कोशी प्रदेश आदिवासी जनजातिहरूको ठूलो जनसंख्या भएको प्रदेश हो,’उनले भने,‘आदिवासी जनजातिको विभिन्न भाषा, संस्कृति, परम्परा र संस्कारले कोशी प्रदेशलाई समृद्ध बनाएको छ ।’

खुवालुङदेखि माङ्सेबुङलगायतका पवित्र स्थलहरू प्रदेशका अमूल्य सम्पत्ति रहेकाले यस्ता धार्मिक धरोहरहरूको संरक्षण र संग्रहालयमार्फत समुदायहरूको पहिचानलाई वर्षौंसम्म चिरस्थायी बनाउन प्रदेश सरकारले काम गरिरहेको मुख्यमन्त्री कार्कीले जारी गरेको सन्देशमा उल्लेख छ । 

संयुक्त राष्ट्रसंघले सन् १९९४ को अगष्ट ९ बाट विश्व आदिवासी दिवस मनाउन सुरु गरेको हो । अगष्ट ९ लाई आदिवासी तथा जनजातिहरूले अधिकार स्थापित गर्ने दिनका रूपमा मनाउँदै आएका छन् । दिवसका अवसरमा शुक्रबार कोशी प्रदेश सरकारले सार्वजनिक बिदा दिएको छ ।