जोमसोम : मुस्ताङको थासाङ गाउँपालिका-४ झिप्रा देउरालीका ५० वर्षीय आइतबहादुर नेपाली आइतबारदेखि परिवारसँग सम्पर्कविहीन छन्।
उनको खोजतलासका लागि परिवारका सदस्यहरूबाट जिल्ला प्रहरी कार्यालय मुस्ताङमा निवेदन परेको थियो। तर, नेपालीको चारैतिर खोजी गरिँदा समेत अझै फेला परेका छैनन्।
थासाङको झिप्रा देउराली बस्ने गहुँगोरो वर्ण, उचाइ ५ फिट ६ इन्च र रातो सर्ट लगाएको ५० वर्षीय नेपालीको नेपाल प्रहरी र नेपाली सेनाको टोलीले खोजीकार्य गरिरहेको भए पनि हालसम्म फेला पार्न नसकिएको मुस्ताङका प्रहरी प्रमुख डीएसपी सूर्यबहादुर बोगटीले जानकारी दिए।
हराएको दिन आइतबार घरबाट मुस्ताङको थासाङ-४ घाँसामा आफन्त मरेको ठाउँमा पुगेका थिए। मादक पदार्थ सेवन गरी आफन्त मरेको ठाउँबाट हिँडेका नेपाली त्यसपछि भने सम्पर्कमा नआएको प्रहरीमा पेश गरिएको निवेदनमा उल्लेख छ। घटनाका सम्बन्धमा सोही वडाका वडाध्यक्ष नगेन्द्र शेरचनले हराएको भोलिपल्ट सोमबार इलाका प्रहरी कार्यालय लेतेलाई सम्पर्क गरेर जानकारी दिएका थिए।
हराइरहेका नेपालीको खोजीका लागि करिब २५ जनाभन्दा बढी स्थानीय खटिएका छन्।
प्रतिक्रिया दिनुहोस !
