प्रधानमन्त्री ओली चीनमा गएर देशको हितमा महत्त्वपूर्ण निर्णय गर्नुभयो : देउवा

काठमाडौं : नेपाली कांग्रेसका सभापति शेरबहादुर देउवाले कांग्रेस र एमाले नेतृत्वको सरकारले राम्रो काम गरिरहेको दाबी गरेका छन्। शनिबार विराटनगरमा नेपाली कांग्रेस कोशीको प्रथम प्रदेश सम्मेलनको उद्घाटन गर्दै सभापति देउवाले राजनैतिक स्थायित्व र सरकारको स्थिरताका लागि नयाँ गठबन्धन बनाइएको बताएका हुन्।  

उनले ले एमालेसँगको सहकार्यप्रति ढुक्क रहन कांग्रेस पंक्तिलाई आग्रह गरे। वर्तमान गठबन्धनलाई २०८४ सम्म निरन्तरता दिइने उनको भनाई छ। 
नेपालले कुनै पनि मुलुकसँग ऋण लिन नहुने जिकिर गर्दै देउवाले प्रधानमन्त्री केपी शर्मा ओलीले चीन भ्रमणमा कुनै ऋण सम्झौता नगरेको बताए। ओलीले बेल्ट एण्ड रोड इनिसिएटिभ्स (बीआरआई) परियोजनाअन्तर्गत अनुदानमा मात्रै सहमति गरेर आएको सभापति देउवाको दाबी छ।

प्रधानमन्त्री ओलीको प्रशंसा गर्दै देउवाले भने, ‘उहाँले चीनसँग ऋण लिएको कुरा गर्नुभएन। हामी ऋणको खिलाफ होइन। तर, विश्व बैंक लगायतसँग ऋण लिएका छौं, अन्य राष्ट्रसँग ऋण लिने नीति छैन, ऋणको भार धेरै हुँदा अप्ठ्यारो पर्न सक्ने भएकोले उहाँले महत्त्वपूर्ण निर्णय गरेर आउनुभएको छ।’

सभापति देउवाले वडा वडामा पार्टीको संगठन निर्माण गर्न कार्यकर्ताहरुलाई निर्देशन दिँदै प्रदेश सम्मेलनबाट आएका सुझाव र मार्गदर्शनहरूलाई केन्द्रीय समितिमा लगेर छलफल गराइने जानकारी गराए।