दयाराम परियार स्मृति मानव अधिकार पुरस्कार वरिष्ठ अधिवक्ता कृष्णप्रसाद भण्डारीलाई

काठमाडौं : अधिकारकर्मी दयाराम परियारको स्मृतिमा राष्ट्रिय मानव अधिकार आयोगले स्थापना गरेको ‘दयाराम परियार स्मृति मानव अधिकार पुरस्कार’ वरिष्ठ अविक्ता कृष्णप्रसाद भण्डारीलाई प्रदान गरिएको छ। मानव अधिकार, कानुनी शासन एवं सामाजिक न्यायको क्षेत्रमा भण्डारीले पुर्‍याएको योगदानको कदर गर्दै पुरस्कार प्रदान गरिएको आयोगले जनाएको छ।

७६औं अन्तर्राष्ट्रिय मानव अधिकार दिवसको अवसर पारेर आयोगले मंगलबार आयोजना गरेको समारोहमा उपप्रधानमन्त्री विष्णु पौडेलले वरिष्ठ अधिवक्ता भण्डारीलाई उक्त पुरस्कार प्रदान गरे। समारोहमा राष्ट्रिय मानव अधिकार आयोगका अध्यक्ष तपबहादुर मगरले वरिष्ठ अधिवक्ता भण्डारीलाई सम्मान गरेका थिए। अधिकारकर्मी दयाराम परियारको मानव अधिकार आयोग जनकपुर कार्यालयमा कार्यरत रहँदा शाहीकालमै २०६२ चैत ११ मा प्रहरीको गोली लागी उपचारका क्रममा चैत १५ गते मृत्यु भएको थियो।

अधिकारकर्मी परियारको सम्मानमा हरेक वर्ष यो पुरस्कार प्रदान गरिँदै आइएको हो। हाल सम्म मानव अधिकार तथा सामाजिक न्यायको क्षेत्रमा योगदान गरेका डा. शिवमाया तुम्बाहाम्फे, श्याम सुन्दर शशी, दुर्गा घिमिरे, चन्द्रकिशोर झा, बलदेव राम, चरिमाया तामाङ, शारदा चन्द, टेकनाथ बराल, मातृका देवकोटा, नजवुल खान, विद्या राजभण्डारी, रामजी अधिकारी, प्रेम कुमारी पन्त, नारायणप्रसाद शर्मा, डाक्टर हरिहर वस्ती, डाक्टर रेणु अधिकारी लगायतले पुरस्कार प्राप्त गरिसकेका छन्।