कबड्डी, नेपालको प्राचीन र लोकप्रिय खेल । जुन अब हामी सबैको बाल्यकालको सम्झना बनिसकेको छ । साथीहरूसँग खेलिएको यो खेल मानिसको जीवनको भाग बनेको छ । २०७४ जेठ ८ गते सरकारद्वारा भलिबललाई राष्ट्रिय खेल घोषणा गरेपछि कबड्डीलाई राष्ट्रिय खेलको मान्यता गुमेको थियो । तर, पनि यो खेल नेपाली मनमा सदैव बसेको छ । यस खेलको लोकप्रियता नेपालको ग्रामीण क्षेत्रदेखि सहरसम्म फैलिएको छ । यद्यपि पछिल्लो समय यसको सन्दर्भ नै ओझेलमा परेको छ ।
एस्ट्रोनिक्स म्यानेजमेन्ट कम्पनीले यसलाई पुनः जीवित पार्न फ्रेन्चाइज मोडलमा नेपाल कबड्डी लिग (एनकेएल) को आयोजना गर्ने निर्णय गरेको छ । यो निकै प्रशंसनीय छ । यसले कबड्डी खेललाई व्यावसायिक बनाउन मद्दत गर्ने छ, यसको लोकप्रियता र साखलाई पुनः स्थापित गर्नमा ठूलो योगदान पु¥याउने छ । यस खेलको पुनः उदयले युवा पुस्तालाई नयाँ अवसर प्रदान गर्ने छ र उनीहरूलाई खेलकुदमा सक्रिय बनाउने छ । कबड्डीको अभ्यासले शारीरिक मात्र होइन, मानसिक विकास पनि गर्छ । यसले मानिसलाई अनुशासन, टिमवर्क र मानसिक स्फुर्ति प्रदान गर्छ । खेलकुदले युवापुस्तालाई कुलत र खराब गतिविधिबाट जोगाउन मद्दत पु¥याउने छ । जसले गर्दा समाजमा सकारात्मक परिवर्तन आउने छ । जस्तो नेपाल प्रिमियम क्रिकेट लिगले सिंगो देशलाई खेलकुदमय बनाएको थियो, त्यस्तै कबड्डीले देशलाई पक्कै जोड्ने छ ।
विगतमा लोकप्रियताको शिखरमा रहेको यो खेल लामो समयसम्म गुमनाम झैं अवस्थामा रह्यो । संघका पदाधिकारीबीचको टकराब र द्वन्द्वले कबड्डीले समयानुकूल फक्रिने अवसर पाउन सकेन । राष्ट्रिय खेलकुद प्रतियोगिता र केही अन्तर्राष्ट्रिय प्रतियोगितामा सीमित बन्न पुग्यो । डेढ वर्षअघि चीनको हाङझावमा आयोजना भएको १९औं एसियाली खेलकुदमा पहिलो सहभागितामै ऐतिहासिक कास्य पदक जितेपछि कबड्डीले चर्चा बटुल्यो । १९औं एसियाली खेलकुदको महिला कबड्डीमा सात राष्ट्रले सहभागिता जनाएका थिए । थोरै राष्ट्रले सहभागिता जनाए पनि पदक जित्न नेपाली खेलाडीले धेरै मेहनत गरेका थिए । देशमै ठूला प्रतियोगिता हुँदा खेलाडीहरूको स्तरोन्नति हुनेछ भने नयाँ खेलाडी जन्मिँदै जानेछन् ।
कबड्डीको लोकप्रियता नेपालमा केवल मनोरञ्जनको साधन मात्रै होइन, यो राष्ट्रको पहिचान र सांस्कृतिक सम्पत्ति पनि हो । यसको पुनर्जीवन र प्रचारले अन्तर्राष्ट्रिय स्तरमा नेपालको पहिचान बढाउन मद्दत गर्ने छ । यसलाई अझ प्रगति र समर्थन दिनका लागि सरकारले खेलकुदको प्रबद्र्धनमा जोड दिनुपर्छ । अन्ततः, कबड्डीको पुनरुद्धार केवल खेलको मात्र कुरा होइन, यो एक सामाजिक, सांस्कृतिक र आर्थिक दृष्टिकोणबाट महत्वपूर्ण कदम हो । यस खेलको पुनर्जीवनले नेपाली समाजलाई एकताबद्ध गर्न र भविष्यमा यसलाई नयाँ उचाइमा पु¥याउन मद्दत गर्ने छ ।
प्रतिक्रिया दिनुहोस !
