काठमाडौंः यसअघिको हारको श्रृंखलामा पूर्णविराम लगाउँदै वेल्सले रसियालाई युरोकप फुटबलको समूह चरणको अन्तिम खेलमा ३–० ले पराजित गरेको छ ।
जित्नै पर्ने अन्तिम खेलमा रियल मड्रिडका स्ट्राइकर ग्यारेथ बेल र आर्सनलका मिडफिल्डर आरोन राम्सी चम्केपछि वेल्सले रसियालाई घरको बाटो देखाउँदै समूह विजेताकारुपमा प्रि क्वार्टरफाइनलमा पुग्न सफल भएको हो ।
वेल्सको पहिलो युरोकपलाई सुखदरुपमा अघि बढाउने क्रममा जोए एलनको पासमा राम्सीले ११ औं मिनेटमा पहिलो गोल गरे ।
पहिलो गोल गरेको नौ मिनेटमा वेल्सले अग्रता दोब्बर बनायो । खेलको २० औं मिनेटमा नेली ट्यलोरले गोल गर्दै अग्रता २–० मा पुर्याए ।
पहिलो हाफमा दुई गोलको अग्रता लिएको वेल्सले दोस्रो हाफमा पनि गोल गर्यो । यो पटक गोल गर्ने पालो थियो ग्यारेथ बेलको ।
उनले पहिलो गोल गरेका राम्सीको पासमा खेलमो ६७ औं मिनेटमा गोल गरेपछि रसियामाथि ३–० को जितसहित वेल्स समूह बिजेता बन्यो ।
समूह ‘बी’ मा रहेको वेल्स इङ्ल्यान्डलाई पछि पार्दैै ६ अंकसहित समूह बिजेता बन्यो । इङ्ल्यान्ड भने समूहको अन्तिम खेलमा स्लोभाकियासँग गोलरहित बराबरी खेलेपछि तीन खेलबाट ५ अंक बटुल्दै अन्तिम १६ मा पुग्यो ।
यसअघि भएका चारवटा भिडन्तमा वेल्सले जित निकाल्न सकेको थिएन । रसियाले तीनमा जित निकालेको थियो भने एउटामा बराबरी भएको थियो ।
प्रतिक्रिया दिनुहोस !
