नेपाल-भारत प्रबुद्ध बैठक आज

काठमाडौं: नेपाल-भारत प्रबुद्ध समूह (इमिनेन्ट पर्सन्स ग्रुप) को पहिलो बैठक सोमबार काठमाडौंमा सुरु हुने भएको छ । नेपाल-भारत शान्ति तथा मैत्री सन्धि (सन् १९५०) लगायत द्विपक्षीय सन्धि तथा सम्झौता पुनरावलोकन, अद्यावधिक र आवश्यक परे खारेजसमेत गर्न दुवै देशका सरकारलाई सुझाव दिन गठित उक्त समूहको गठन भएको हो ।

प्रधानमन्त्री केपी ओलीको फागुनमा सम्पन्न भारत भ्रमणमा समूहको औपचारिक गठनको घोषणा गरिएको थियो । नेपाली पक्षको प्रबुद्ध समूहको सचिवालय नारायणहिटीस्थित राहदानी विभागको भवनमा स्थापना गरिएको छ । भारतीय पक्षको प्रबुद्ध समूहको कार्यालय त्यहाँको रक्षा मन्त्रालय मातहतको अर्ध स्वायत्त निकाय इन्स्टिच्युट अफ डिफेन्स अनालाइसिस (आईडीएसए) मा स्थापना भइसकेको छ ।

नेपाल-भारत शान्ति तथा मैत्री सन्धिलगायतका अन्य द्विपक्षीय सहमति र सन्धिबारे समूहले दुवै सरकारलाई दुई वर्षभित्र प्रतिवेदन दिनेछ । समूहका सदस्य एवम् एमाले सांसद डा. राजन भट्टराईले पहिलो बैठकले समूहले आगामी दिनमा गर्ने कामको मोडालिटी तयार गर्ने बताए ।

समूहमा नेपालका तर्फबाट पूर्वराजदूत डा. भेषबहादुर थापा, सांसद भट्टराई, कानुनविद् सूर्यनाथ उपाध्याय र पूर्वमन्त्री नीलाम्बर आचार्य सदस्य छन् । त्यसैगरी भारतका तर्फबाट पूर्वराजदूत जयन्त प्रसाद, प्राध्यापकद्वय महेन्द्र लामा र भुवन उप्रेती तथा भारतीय जनता पार्टीका नेता भगतसिंह कोसियारी सदस्य छन् ।

नेपाल र भारतबीचको रानीतिक सम्बन्ध पूर्ण रूपमा सुधार आउन नसकिरहेका बेला समूहको बैठक बस्न लागेको हो । बैठकले सम्बन्ध सुधार ल्याउनसमेत सहयोगी भूमिका निर्वाह गर्ने अपेक्षा गरिएको छ ।