भारतीय सरकारमा पहिलोपटक गोर्खाल्यान्डका मन्त्री

दार्जिलिङ: मोदी सरकारले मंगलबार दार्जिलिङका लोकसभा सांसद एसएस आहलुवालियाजीलाई राज्यमन्त्री बनाएपछि स्वतन्त्र भारतको इतिहासमा दार्जिलिङका सांसदले पहिलोपटक मन्त्रीमण्डलमा प्रवेश पाएको भन्दै गोर्खा जनमुक्ति मोर्चासहित नागरिकले खुसी व्यक्त गरेका छन् ।

मोर्चा अध्यक्ष विमल गुरुङले मोदी मन्त्रीमण्डल पुनर्गठनपछि मंगलबार भने, ‘स्वतन्त्र भारतको इतिहासमा दार्जिलिङका सांसदले युनियन क्याविनेटमा स्थान पाएको यो पहिलोपटक हो । उक्त पहलले भाजपा सरकारको दार्जिलिङ र डुवर्स क्षेत्रका जनताका निम्ति सम्मान अनि आदर भाव झल्किन्छ ।'

भारत स्वतन्त्र भएदेखि अहिलेसम्म नेपाली भाषीको बाहुल्यता रहेको दार्जिलिङका सांसदले सरकारमा प्रवेश पाएका थिएनन् । गोर्खाल्यान्ड माग गर्दै लडेका गोर्खालीले यो कदमलाई सकारात्मक रूपमा लिएको बताएका छन् ।

 

गोर्खाल्यान्डका लागि विभिन्न चरणको आन्दोलन गरेको मोर्चाका अध्यक्ष गुरुङले आहलुवालियाको क्याबिनेट प्रवेशलाई दार्जिलिङ र उत्तर बंगालले उच्चस्तरको नीति निर्धारण गर्ने अवसरको रूपमा उल्लेख गरेका छन् ।

प्छिल्लो पटक गोर्खा टेरिटोरियल एड्मिनिस्ट्रेटिभ (जीटीए) मा पुगेर गोर्खाल्यान्डको आन्दोलन सुस्ताएको आरोपका बीचमा यो घटनाले सकारात्मक सन्देश दिएको मोर्चाको बुझाइ छ ।

अन्य दलले भने प्रतिक्रिया सार्वजनिक गरेका छैनन् । २०१४ मा मोदी सरकार बनेपछि यस पटक ठूलो संख्यामा मन्त्री र राज्यमन्त्री थपिएका छन् । मोदीले गोर्खाको सपनालाई आफ्नो सपना भनेर पहाडको भोट मागेका थिए । मोदीले पहाडका लागि गरेको बाचा भुलेको आरोप लाग्दै आएको थियो ।