फियाट पुन्टो प्युअर नाडामार्फत सार्वजनिक

काठमाडौंः इटालियन ब्रान्ड फियाट कारको आधिकारिक बिक्रेता लाइफ अटोमोबाइलले नाडा अटो सोमा ‘फियाट पुन्टो प्युअर’ सार्वजनिक गरेको छ । नेपाली राष्ट्रिय क्रिकेट टिमका कप्तान पारस खड्काले नाडा अटो सोमा फियाट्को नयाँ कार सार्वजनिक गरेका हुन् ।

इन्ट्रि-लेभलको ह्याचब्याक कारको रूपमा ल्याइएको पुन्टो प्युअर बलियो बनोट, पर्याप्त स्पेस, उच्च ग्राउन्ड क्लेरेन्स र प्रिमियम डिजाइनका साथ उपलब्ध भएको छ । लाइफ अटोमोबाइलका बिजनेस हेड सुरज मानन्धरका अनुसार पुन्टो प्युअर इन्ट्रिलेभल भेहिकलमा सबैभन्दा उत्तम विकल्प हो ।

गाडीको चाहना भएकाका लागि यो पहिलो कार हुनसक्ने बताए । कम्पनीले कम मूल्यमा प्रिमियम सुविधा भएको यो कारले ह्याचब्याक सेग्मेन्टमा जादु गर्ने अपेक्षा गरेको छ । १.२ लिटर फायर पेट्रोल इन्जिनमा उपलब्ध हुने यो कारले ६ हजार आरपीएममा ६८ पीएस उर्जा र २५ सय आरपीएममा ९६ एनएम टर्क उत्पन्न गर्ने कम्पनीले जनाएको छ ।

४५ लिटर क्षमताको फ्युल ट्यांक भएको यो इटालियन कारले १५.७ केएमपीएल माइलेज दिन्छ । १९५ मिलिमिटर ग्राउन्ड क्लेरेन्स रहेको कार यो क्लासकै सबैभन्दा बढी रहेको कम्पनीको दावी छ । पुन्टो प्युअर ‘एक्जोटिक रेड’, ‘हिपहप ब्ल्याक’ र ‘ह्वाइट’ गरी तीन रंगमा बजारमा उपलब्ध हुनेछ ।