पोखराको फेवाताल सरसफाइमा एसबीआई बैंक
काठमाडौंः नेपाल एसबीआई बैंक लिमिटेड र पोखरा उपमहानगरपालिकाबीच विश्वप्रसिद्ध पर्यटन गन्तव्य फेवातालको सौन्दर्यीकरण तथा सरसफाइ गर्नेसम्बन्धी समझदारी भएको छ ।
पोखरामा आयोजित एक कार्यक्रममा बैंकको तर्फबाट नायब कार्यकारी अधिकृत एवं प्रमुख सञ्चालन अधिकृत विजयकुमार त्यागी र पोखरा उपमहानगरपालिकाका तर्फबाट निवर्तमान प्रमुख कार्यकारी अधिकृत ओमराज पौडेलले सम्झौतामा हस्ताक्षर गरेका छन् ।
सम्झौताअनुसार बैंकले फेवाताल किनारमा हाल निर्माण भएको पदयात्रा मार्गमध्ये एक सयदेखि दुइ सय मिटर क्षेत्र वरिपरि अधिकतम १५ वटा वि श्राम स्थल निर्माण गर्ने, बगैंचा तयार पार्ने र हरियाली बनाउने काम गर्नेछ ।
सोही समझदारीअन्तर्गत बैंकले उक्त स्थानमा स्थानीय एवं बाह्य पर्यटकको सुविधालाई ध्यानमा राखी महिला र पुरुषका लागि छुट्टाछुट्टै शौचालय, स्वच्छ पिउने पानी वितरण कक्ष, बैंकिङ टर्मिनल कक्षसमेत निर्माण गर्नेछ ।
हाल बाराही घाटमा निर्मित उद्धार टावरको सौन्दर्यीकरण गर्ने बैंकले जनाएको छ । बैंकले आफ्नो संस्थागत सामाजिक उत्तरदायित्व अभियानअन्तर्गत उक्त क्रियाकलाप गर्न लागेको जनाएको छ ।
प्रतिक्रिया दिनुहोस !
