काठमाडौः वर्ल्डलिंक कम्युनिकेसन्सले २१औं वर्ष प्रवेशको अवसरमा २१ रुपैयाँमा इन्टरनेट जडान गर्ने अफर ल्याएको छ । कम्पनीले आफ्नो २१औं वार्षिकोत्सव अवसरमा यस्तो योजना ल्याएको हो ।
आइतबार कम्पनीले २१औं वार्षिकोत्सव अवसरमा विभिन्न कार्यक्रमको पनि आयेजना गरेको थियो । कम्पनीका कार्यकारी निर्देशक विजय जालानका अनुसार कम्पनीले २१ रुपैयाँ जडान शुल्कमै पाँच एमबीपीएस गतिमा इन्टरनेट उपलब्ध गराउने छ ।
यही शुल्कमा ग्राहकले जडान गर्ने स्थानसम्म चाहिने फाइबर केबल, वाइफाइ राउटर र इन्टरनेट प्रोटोकल (आईपी) टीभी सेटअप बक्स निःशुल्क पाउनेछन् । त्यस्तै एक वर्षको इन्टरनेट शुल्क तिर्ने ग्राहकले तीन महिनासम्म आईपी टीभी निःशुल्क हेर्न पाउने कम्पनीले जनाएको छ ।
वाइफाइ राउटर लिन चाहने ग्राहकले तीन हजार रुपैयाँ धरौटी राख्नुपर्छ । आईपी टीभी नेपालमा पछिल्लो पटक भित्रिएको नयाँ प्रविधि हो । यस प्रविधिबाट ग्राहकले इन्टरनेट फाइबरकै माध्यमबाट टीभी हेर्न पाउँछन् ।
यस्तो प्रविधिबाट प्रसारण हुने टीभीमा ग्राहकले एक साताअगाडिको कार्यक्रमसमेत हेर्न सकिने जालानले जानकारी दिए । वार्षिकोत्सवका अवसरमा कम्पनीले आइतबार जाउलाखेलमा रक्तदान कार्यक्रम आयोजना गरिएको थियो ।
उक्त कार्यक्रममा दुई सयजनाले रक्तदान गरेका छन् । कम्पनीले यसै अवसरमा विभिन्न स्थानमा रहेका अपांगता भएका व्यक्तिलाई खानेकुरा वितरण गर्नेसमेत जनाएको छ । कम्पनीले ललितपुरस्थित जिल्ला प्रशासन कार्यालयमा वाइफाइ हटस्पट स्थापना गर्ने निर्णयसमेत गरेको छ ।
प्रतिक्रिया दिनुहोस !
