काठमाडौं: नोभेम्बर पहिलो साताका लागि निर्धारित दक्षिण एसियाली क्षेत्रीय सहयोग संगठन (सार्क) को १९ औं शिखर सम्मेलन नहुने लगभग निश्चित भएको छ ।
भारतले आगामी सम्मेलनमा आफू सहभागी हुन नसक्नेबारे सार्कको अध्यक्ष देश नेपाललाई जानकारी गराएको हो । कुनै एक सदस्य देश शिखर सम्मेलनमा सहभागी हुन नसक्दा सम्मेलन आयोजना हुन नसक्ने प्रचलन छ ।
भारत नियन्त्रित कस्मीरको उरी क्षेत्रमा गत साता भएको आतंकवादी हमलामा १८ भारतीय सैनिक मारिएपछि भारत—पाकिस्तान सम्बन्ध थप कटुतापूर्ण बनेको छ । भारतले उक्त आतंकवादी हमलामा पाकिस्तानको हात रहेको बताएको छ भने पाकिस्तानले त्यसको खण्डन गरेको छ ।
सार्कका महत्त्वपूर्ण दुई सदस्य मुलुकबीच बढ्दो तनावले सम्मेलन तोकिएको मितिमा नहुने भएको हो । भारतीय विदेश मन्त्रालयले मंगलबार जारी गरेको विज्ञप्तिमा सार्कको अध्यक्ष मुलुक नेपाललाई सार्क शिखर सम्मेलनमा भारत सहभागी हुन नसक्ने अवगत गराइएको उल्लेख छ ।
प्रतिक्रिया दिनुहोस !
